Da pausa veseva ei buca ora bein per Schluein Glion. Treis gols da Sargans enteifer la 22avla e 30avla minuta han buca schau sperar che l’equipa sappi aunc recaltgar puncts tier igl actual capogruppa. Mo ina midada da sistem ed in bien spert cumbattiv da mintga giugadur han schau egalisar il resultat en la secunda mesadad.

E l’equipa da Schluein Glion ha fatg ei ualti tgunsch a Sargans dad ir en avantatg cun treis gols. Ils indigens han numnadamein profitau tier ils emprems dus gols da sbagls dalla defensiun, omisdus ein curdai suenter culps libers ord gronda distanza, ils quals ils defensurs da Schluein Glion han buca saviu liberar. Il tierz gol ei curdaus sin in pass liung sur la defensiun ora, cul qual Pablo Müller ei mitschaus – ord ina posiziun che ha ferdau ualti fetg suenter ordgiug – e battiu il goli Flurin Capaul per la tiarza gada. Schluein Glion ha fatg il giug duront l’entira emprema mesadad denton agiu en l’offensiva memia cumplicau ed aschia buca saviu reussir.

Da pausa ha il trenader da Schluein Glion, Mirco Zala, fatg duas midadas ed era midau sistem. L’equipa ha dau mo pli cun treis defensurs e persuenter cun treis attacaders e cun in auter spert cumbattiv che avon pausa. Quellas midadas han purtau fretg. Schluein Glion ha dominau il giug e las attaccas ein vegnidas pli e pli concretas. Igl emprem gol per l’equipa sursilvana ei lu curdaus en la 56avla minuta. Il goli da Sargans ha saviu rebatter in siet da Rafael Deplazes, la balla ei denton curdada avon il peis al medem giugadur che ha alzau ella cun in flanca avon gol nua che Sattar Afzali ha menau la balla cul tgau en gol. Quei gol ha dau ulteriur slonsch a Schluein Glion e Sargans ei seretratgs en la defensiun ed ha mo pli empruau da vegnir cun cunterattaccas al success. Il secund gol per Schluein Glion ha Rafael Deplazes iniziau en la 70avla minuta cun in pass el profund per Lars Zala, il qual ha persuls avon gol realisau siu tschunavel gol persunal en questa sesiun. Per l’egalisaziun dil resultat ei Rafael Deplazes staus sezs responsabels. El ei vegnius lantschaus en la 84avla minuta da Ronny Casutt cun in pass en la gassa ed ha battiu il goli cun in siet el cantun bass. Atgnamein han aspectaturas ed aspectaurs spitgau ch’il giug mundi cun quei resultat da 3:3 a fin. Mo las davosas minutas dil giug ein, grazia agl arbiter, aunc stadas inagada ualti dramaticas. En la 90avla minuta ha el numnadamein schulau suenter ina acziun en la zona da puniziun da Schluein Glion e mussau sil punct da penalti! Chris Tanner ha getg engraziel e marcau in ulteriur gol per Sargans. Quei gol ha denton buca muntau la victoria per ils indigens. Il giug ha numnadamein aunc cuzzau tschun minutas ed en la davosa minuta ha igl arbiter schulau en zona da puniziun da Sargans in foul. Aschia che Schluein Glion ha saviu egalisar entras Ronny Casutt cun in siet naven dil punct da penalti.

FC Sargans – US Schluein Glion 4:4 (3:0)

Riet. – 135 aspectaturs/-as. – AR: Kamber

Gols: 22. Santa 1:0, 27. Müller 2:0, 30. Müller 3:0, 56. Afzali 3:1, 70. Lars Zala 3:2, 83. Deplazes 3:3, 90. Tanner 4:3 pen., 90. + 4. Casutt 4:4 pen..

Sargans: Kurath; Buchli (73. Bleisch), Schai, Bernhardsgrüter, Santa; Tanner, Roner, Zollino (80. Schlegel), Mathis (26. Burmeister); Iseni (75. Hobi), Müller.

Schluein Glion: Capaul; Laurin Zala, Coray, Aron Büchler (46. Afzali), Cavegn (46. Walter); Arpagaus, Vinzens (58. Rechenbach), Ronny Casutt, Deplazes; Caduff, Lars Zala.

Remarcas: Cartas mellnas: 45. Coray (foul), 50. Müller (foul), 62. Deplazes (reclamar). – Schluein Glion senza Paulin (reconvalescents), Gianluca Casutt, Gomes, Manetsch, Weishaupt (absents). – 36. siet en la traversa Schluein Caduff; 60. siet en la traversa Sargans (Zollino). – Corners: 6:9.