(rtr) Il stadion da ballape Crap Gries a Schluein e las staziuns da la pendiculara a Vicosoprano en Bregaglia èn nominads per il Premi d’architectura per renovar e construir a moda durabla en las Alps. Sco che l’Uffizi federal da svilup dal territori ha communitgà ha la giuria cun represchentants da tut ils pajais da las Alps nominà 30 projects, 10 da quels sa chattan en Svizra. Cun quest premi vegnian premiads edifizis en las Alps cun in stil da construir durabel. La Svizra ed il Principadi da Liechtenstein organiseschan l’occurrenza «Constructive Alps» per la quarta giada. Il premi è dotà cun 50 000 euros e vegn surdà l’october da quest onn. Sco l’uffizi federal scriva vegnia ils proxims dis ina giuria a visitar tut ils bajetgs nominads. Tranter ils nominads en Svizra sa chattan era la chamona Cabane Pambert en il Vallais u er ils edifizis dal tribunal penal federal a Blinzuna.
La Quotidiana, 16.03.2017