Per dar propi nova speronza da saver mitschar dalla relegaziun havess Schluein Glion stuiu gudignar il giug a casa encunter il club da ballapei da Ruggell. Quei ei denton buca reussiu encunter il vischin en la tabella. En in giug, el qual las occasiuns da marcar ein stadas plitost raras han omisduas equipas sittau in gol ed aschia partgiu ils puncts.
Schluein Glion ha entschiet il giug cun ina tactica plitost defensiva e sperau da vegnir cun spertas cunterattacas al success. L’equipa da Ruggell ha denton buca fatg il plascher als indigens da fierer tut anavon, anzi ella ha medemamein empruau da lantschar lur attaccaders cun pass liungs ord la defensiva. Tier omisduas equipas ha quella tactica purtau negin fretg, aschia che la 29avla minuta ei arrivada avon ch’ei capeti enzatgei decisiv avon in gol. En quella minuta ha Manuel Ritter sittau in liunga flanca neu dalla vart dretga, la quala ei setschentada en la latta traversa e da leu avon ils peis ad Agim Zeciri. Il siet da tal ha tuccau il bratsch da Simon Gallmann, aschia ch’igl arbitrader ha saviu far nuot auter che schular in penalty. Agron Beqiri ha sittau quel ferm denton buca fetg bein plazzau en cantun seniester, aschia ch’il goli da Schluein Glion, Dusan Gerath, ha saviu fermar la balla cun ina biala parada.
Era suenter pausa ei il giug buca vegnius bia megliers. Ad omisduas equipas muncava empau la classa per saver scaffir occasiuns da marcar, aschia ch’ina situaziun da standard ha stuiu purtar igl emprem gol. Quel ei gartegiaus a Ruggell. Vito Troisio ha diregiu in culp liber dalla vart dretga avon il gol e leu ha Stefan Maag saviu deviar la balla en la reit.
Schluein Glion ha reagau sin quella frida. Il trenader Cyrille Belinga ha midau en dus giugadurs offensivs e diregiu il defensur David Bystron en l’attacca. Quei ha purtau success. En la 75avla minuta ha Linus Tschalér recaltgau ina balla en la da sedisch da Ruggell e stuschau ella a David Bystron. Lez ha viu che Ramon Derungs era plazzaus bein e libers sin la lingia da sedisch e ha dau ad el in pass precis. Ramon Derungs ha priu la caschun e sittau la balla bass sper il goli vi en la reit.
Quei gol ha dau curascha als indigens ed els han ussa empruau da sittar il gol decisiv. Quei ei denton buca gartegiau, memia pauc decisivas eran las attaccas e memia pauc exacts ils biars pass. Aschia eis ei reussiu a Ruggell da salvar il remis entochen la fin ed aschia mantener igl avantatg da sis puncts en la tabella sin Schluein Glion. A Schluein Glion restan ussa aunc siat giugs per mitschar dalla relegaziun. Igl meglier ei sch’ei entscheivan gia sonda proxima encunter Weesen a recaltgar puncts.
Telegram
US Schluein Glion – FC Ruggell 1:1 (0:0)
Crap Gries. – 300 aspectaturs. – AR Ristemi
Gols: 66. Maag 0:1, 75. Ramon Derungs 1:1
Schluein Glion: Gerath; Gallmann, Möglich, Bystron, Welter; Dermont, Ramon Derungs, Livio Derungs (71. Bonolini), Luca Vinzens (71. Tschalér); Tiziano Vinzens, Gabriel Derungs.
Ruggell: Spahic; Maag, Ritter, Beqiri, Alexander Marxer; Kollmann, Beck, Troisio (68. D’Elia), Haas (46. Wolfinger); Constantin Marxer (90.+1. Quaderer), Zeciri.
Remarcas: Schluein Glion senza Albin ed Andreoli (omisdus blessai), Nay (absents), Jan Berni e Serafin Bundi (omisdus serrai). – Admoniziuns: 15. Troisio (foul), 60. Alexander Marxer (foul), 70. Welter (foul), 80. Beqiri (nunsportivadad), 82. Beck (foul), 90 D’Elia (foul). – Mellen-tgietschen: 88. Beck (reclamar). – 29. siet en la traversa da Beck. – 30. Gerath tegn in penalty sittaus da Beqiri. – relaziun da corners: 7:4.