Schluein Glion menava suenter ina buna emprema mesadad cun bia occasiuns da far gols claramein cun 3:0 ed il giug pareva decidius. Mo igl ei vegniu tut auter! Suenter pausa ha l’equipa indigena creau pli u meins negina acziun offensiva pli e la finala aunc incassau en la davosa minuta il gol al 3:3.
Strusch da crer che las medemas duas equipas han giugau la sonda sera da plitost aura miserabla il giug da campiunadi a Crap Gries. Avon pausa ha numnadamein mo Schluein Glion dau bal ed havess saviu ni forsa schizun stuiu esser cun in miez tozzel gols en avantatg. Strembliu ha la reit davos il davos um da Cuera denton mo treis gadas. En la 23avla minuta ha Gabriel Derungs sittau siu emprem gol en quest campiunadi suenter in bi solo da Marino Cavegn sur l’ala dretga. Siat minutas pli tard ha Serafin Bundi surviu Lars Caduff cun in pass en la profunditad ed il giuven attaccader ha sittau la balla ferm, precis e segir da gol en. Cuort avon pausa ei lu Linus Tschalèr vegnius lantschaus en la da sedisch da Gabriel Derungs ed ha ord endisch meters giu negin perdun cun il goli da Cuera. Sper quels treis gols ha Schluein Glion giu numerusas occasiuns da far gols mo nezegiau negina. Cunzun cul tgau han divers giugadurs falliu la mira nuncapeivlamein. Cuera 97 ha en l’entira emprema mesadad sittau buc inagada in siet sin gol.
Quei san ins era gir dil giug da Schluein Glion dalla secunda mesadad: buc in siet sin gol ei gartegiaus all’equipa indigena. Cuera ha surpriu il domini e la finala schizun aunc saviu egalisar il resultad en la pli davosa minuta dil giug. Ils emprems dus gols ha Cuera sittau cun in culp liber e suenter in corner ed il tierz gol suenter che giugadurs ed aspectaurs indigens han spitgau sin in schul da foul digl arbiter. Mo lez ha buc’ interrut il giug ed Eric Ott ha nezegiau la caschun da sittar siu secund gol persunal al resultad final.
US Schluein Glion – Cuera 97 2 3:3 (3:0)
Crap Gries. – 175 aspectaturs. – AR: Aliji
Gols: 23. Gabriel Derungs 1:0, 30. Caduff 2:0, 42. Tschalèr 3:0, 48. Yogarajah 3:1, 82. Ott 3:2, 90.+2 Ott 3:3.
Schluein Glion: Capaul; Livio Derungs, Möglich, Welter; Bundi, Gallmann, Cavegn, Tiziano Vinzens, Tschalèr (67. Machado Gomes); Caduff (89. Dakic), Gabriel Derungs (57. Luca Vinzens).
Cuera 97 2: Miranda; Caluori, Durmisi, Montalta, Maffezzini; Yogarajah,Forster, Monteiro, Catricala, Thavapararajah; Mutapcija (Remplazzaments: Ott, Affolter, Sisera, Ipek, Dervishi, Repiso).
Remarcas: Schluein Glion senza Albin, Camenisch e Hornacek (reconvalescent), Andreoli, Berni e Dermont (blessai). – Cartas mellnas: 45. Montalta, 51. Tschalèr, 52. Forster (tuts per fouls).