El davos giug dalla sesiun 2017/18 ha noss’emprema equipa declassau il SC Razén cun 11:1, aschia menau igl adversari ella malura ed alla relegaziun. Gia egl emprem giug dalla sesiun nova ei l’equipa rutinada dil Plaun serevantschada cun ina victoria da 2:1 encunter la secunda dall’USSI.
La tactica dil trenader niev da nossa secunda, Corsion Derungs, ei stada clara avon il giug: Empruar da giugar in ballapei cultivau, buc ir el cunti agl adversari e sbassar il diember da sbagls individuals en cumparegliaziun cul giug da Cup Grischun encunter ils Lusitanos de Samedan (terrada da 1:4 per l’USSI). Aschia ei si’equipa sepresentada cun ina defensiun solida e cumpacta che ha buc schau tier biaras caschuns da marcar agl adversari. Anzi, cun cunterattaccas spertas havessen ils hosps dalla Surselva saviu ir en avantatg gia baul el giug. Ils attaccaders ein denton buc vegni da finir schubramein las acziuns ni ch’els han munchentau il gol. Cun situaziuns da standard ei l’equipa da casa vegnida da crear entginas bunas schanzas. Consequentamein ha ei scalinau el gol dall’USSI suenter 35 minutas a caschun d’in corner.
Suenter pausa ha il SC Razén surdau pli fetg il dictat dil giug all’USSI ed empruau d’haver success cun cunterattaccas. Cun ina tala cunterattacca han els saviu marcar il 2:0 ella 65avla minuta. Malgrad la calira ed il resultat disfavoreivel ha l’equipa dalla Foppa buc dau si ed empruau vinavon da crear schanzas da marcar. Quei ei reussiu a Gian Sgier cuort avon la fin dil giug cun in siet plazzau. Per dapli che il 1:2 ha ei denton buc tunschiu.
El proxim giug frunta la secunda dall’USSI sil CB Laax, dumengia ils 26-08-2018 allas 16:00 a Schluein.
SC Razén – US Schluein Ilanz 2 2:1 (1:0)
Saulzas, Razén
Gols: 35. SC Razén 1:0, 65. SC Razén 2:0, 86. Gian Sgier 2:1
US Schluein Ilanz 2: Marco Cavegn (82. Arno Panier); Dario Casutt, Silvan Frehner, Marc Camenisch, Robin Studer; Noah Weber, Gian Sgier, Arno Panier (67. Ronny Panier), Fabrizio Bonolini (70. Livio Casutt); Ronny Della Morte, Dario Derungs (76. Sadat Hares)
Remarcas: 82. Robin Studer remplazza Marco Cavegn sco goli, emprem giug da campiunadi da Sadat Hares