Auter ch’els davos giugs, eis ei puspei inaga gartegiau a nos attaccaders da sittar gols. Aschia ha l’USSI 2 saviu volver il giug ella secunda mesadad ed ha uss sil conto treis puncts dapli.
L’entschatta da quei derby ei plitost stada ruasseivla. Empau ord il nuot ei lu igl emprem gol gartegiaus all’US Danis – Tavanasa suenter 20 minutas. In siet da lunsch ha anflau la viu sur il goli o ed ella reit. La reacziun dall’equipa da casa ei vegnida promtamein. Ella 23avla minuta han els giu discletg duas gadas suenter corners. La balla ei rulada per pauc sper il gol vi ni che la defensiun da Danis – Tavanasa ha saviu evitar l’egualisaziun dil resultat el davos mument. Silsuenter ei il giug vegnius empau pli ruhs ed igl arbiter ha entschiet a repartger cartas melnas ina suenter l’autra, sin omisduas varts. Igl ei da smarvegliar che negin dils giugadurs ha viu la carta cotschna entochen la fin dil giug. Vid il resultat ei semidau nuot entochen pausa, aschia che las equipas ein idas en garderoba cun in resultat da 0:1.
Ella secunda mesadad eis ei gartegiau all’equipa da casa da far dapli squetsch silla defensiun digl adversari, malgrad ch’ella ha agiu cun da bia ballas liungas. Suenter 50 minutas ei Fabian Coray mitschaus en direcziun gol ed ha tuc la petga cun siu siet. La balla ei rebattida avon ils peis da Noah Weber che sesanflava leu nua ch’in attaccader ha da star e quel ei vegnius da marcar igl 1:1. Vinavon ein combinaziuns cultivadas stadas plitost ina raritad en quei giug. Tuttina ein omisduas equipas vegnidas tier lur schanzas da marcar. Ella 74avla minuta ei Gian Sgier semess atras encunter ils adversaris da Danis – Tavanasa. Amiez la da sedisch spitgava Dario Derungs, che ha buc giu breigia da marcar igl 2:1 per sia squadra. Cun dus gols tipics per attacaders ei l’USSI 2 pia vegnida da menar quei giug. Ch’ei ha dau neginas midadas vid il resultat ei d’engraziar alla buna prestaziun defensiva dall’equipa da casa, sco era ad ina parada miraculusa da Flurin Capaul ella davosa minuta. Ils treis puncts restan pia a Schluein e nossa secunda fa puspei anavon in pass ella tabella.
El proxim giug frunta l’USSI2 sill’equipa da Panaduz, sonda ils 06-10-2018 allas 18:00 a Panaduz.
US Schluein Ilanz 2 – US Danis – Tavanasa 2:1 (0:1)
Crap Gries, Schluein
Gols: 20. US Danis – Tavanasa 0:1, 50. Noah Weber 1:1, 74. Dario Derungs 2:1
US Schluein Ilanz 2: Flurin Capaul; Dario Casutt, Patrick Camenisch, Marc Camenisch, Robin Studer (71. Ivan Derungs); Ronny Della Morte (86. Hares Sadat), Gian Sgier, Arno Panier, Fabrizio Bonolini (46. Fabian Coray); Noah Weber, Dario Derungs
Remarcas: admoniziuns USSI 2: 25. Fabrizio Bonolini (foul), 35. Arno Panier (nunsportivadad), 38. Noah Weber (foul), 55. Robin Studer (foul), 60. Dario Derungs (foul)
Rapport: Marco Cavegn