Temps da derbi a Crap Gries. El giug denter Schluein Glion e Lumnezia ha l’atmosfera da derbi denton buca propi vuliu nescher. La biala roscha d’aspectaturas ed aspectaturs ha numnadamein viu ina equipa da casa che ha dominau duront igl entir giug e gudignau meritadamein, era en quella altezia.
Il giug che ei vegnius refiers avon duas jamnas ha giu liug gievgia sera avon ina gronda culissa d’aspectauras ed aspectaturs da bunas relaziuns a Crap Gries. L’equipa da Schluein Glion che ha valiu sco favorita per quei giug denter las duas equipas da tiarza ligia dalla Surselva ha dalla biala entschatta priu il giug enta maun. Ils giugadurs indigens han mussau ch’els veglien per tut prezzi recaltgar treis puncts ed aschia mantener il cuntact cun il tgau dalla tabella. Ils giugadurs ord la Val Lumnezia han plitost mussau grond respect e han aschia strusch inagada saviu crear attaccas malsegiras. En l’otgavla minuta ha igl arbiter schulau in penalti suenter in foul en la zona da puniziun da Lumenzia. Quei penalti ha denton buca purtau igl avantatg all’equipa da casa. Martin Mark ha numnadamein reagau bein e teniu cun ina biala parada il siet da Luca Vinzens. Aschia ha igl emprem gol buca propi vuliu curdar, in bi siet da distanza da Fabrizio Cavegn ei numnadamein rebattius dalla petga e Lars Caduff ha sittau la balla cul tgau da cuorta distanza sur gol ora. Pèr en la 32avla minuta eis ei lu stau aschi lunsch: Luca Vinzens ha diregiu la balla cun in culp liber sil tgau dil giugadur-trenader Alessandro Giacomelli che ha plazzau tala sur il goli vi en la reit. Cuort avon pausa ei lu era aunc il 2:0 curdaus suenter ina bellezia cumbinaziun denter ils treis attaccaders da Schluein Glion. Fabrizio Cavegn ha stuschau la balla sin la vart seniastra a Tiziano Vinzens, lez ha cuglianau siu defensur e surviu ella a Lars Caduff che steva tut persuls avon gol e ha buca giu breigia da sittar siu emprem gol en quei giug.
Il secund gol da Lars Caduff ei curdaus cuort suenter pausa. Quella gada ei il caposettagols da Schluein Glion vegnius survius dad in defensur dils hosps ed el ha buca schau rugar duas gadas. Quei gol ha pli u meins decidiu il giug defintivamein. Schluein Glion ha numnadamein dau concentrau vinavon ed ils hosps han mai fatg la pareta da saver dar ina midada al giug. Forsa fuss ei aunc vegniu ina gada empau pli interessant sche Yannick Demont havess sittau en la 57avla minuta cun la suletta occasiun che Lumnezia ha giu egl entir giug il 3:1. El ha denton el cumbat in encunter in buca dumignau la balla sper David Hornacek ora. Ulteriurs gols ein perseunter curdai da tschella vart. Enteifer nov minutas ha Schluein Glion aunc sittau atras Luca Vinzens cun in bi siet da distanza, Lars Caduff cun siu tierz gol persunal e Marino Cavegn, che ha realisau cun in penalti suenter ch’el sez era vegnius mess a tiara en la zona da puniziun, treis gols ed alzau aschia il resultad sin 6:0.
Sco proxim suondan ussa per Schluein Glion dus giugs ordeifer encunter dus adversaris ord l’emprema mesadad dalla tabella. Dumengia proxima ei l’equipa dalla Surselva hosp a Domat e margis ils 30 d’avrel astga ella serender a Sargans e dar il giug ch’ei vegnius refiers dacuort. Buca dus sempels giugs, sche l’equipa vul denton star al tgau dalla tabella ha ei num gudignar omisdus.
US Schluein Glion – CB Lumnezia 6:0 (2:0)
Crap Gries, Schluein. – 440 aspectaturs. – AR: Nesimi
Gols: 32. Giacomelli 1:0, 44. Caduff 2:0, 49. Caduff 3:0, 70. Luca Vinzens 4:0, 77. Caduff 5:0, 79. Marino Cavegn 6:0 (P.).
Schluein Glion: Hornacek (87. Casutt); Silvan Welter (81. Gartmann), Giacomelli (87. Mathias Derungs), Livio Derungs, Sergio Welter; Luca Vinzens (84. Büchler), Bundi (75. Möglich), Marino Cavegn, Tiziano Vinzens (77. Airaghi); Caduff, Fabrizio Cavegn (70. Andreoli).
Lumnezia: Mark; Mauro Cadonau (55. Bastos), Collenberg (85. Casanova), Paul Alig, Capaul; Mattias Alig, Mauro Demont, Danilo Blumenthal (59. Nando Blumenthal), Dino Blumenthal (65. Pascal Derungs); Truffer, Yannick Demont.
Remarcas: carta mellna: 34. Dino Blumenthal (reclamar). – Schluein Glion senza Dermont e Truffer (reconvalescents). – 8. Mark tegn in penalti sittaus da Luca Vinzens, 14. siet en la petga da Fabrizio Cavegn. – debut dil giuven goli Alessandro Casutt. – Corners: 10:2.