Suenter la perfetga victoria encunter Balzers essan nus serendi la gievgia sera a Mels. Motivaziun, fermezia e perschuasiun ein era cheu stai avon maun da mintga giugadura.
Damai che nus havein stuiu stuschar il giug dils 5 da matg muort la neiv havein finalmein saviu serender a Mels. Allas 20:15 ha igl arbiter dau liber il giug. Las damas dall’USSI vulan naven dall’entschatta mussar tgei ch’ellas san. Gia ella tschunavla minuta survegn Lara in bellezia pass da Anna(streh)Lea e vegn aschia da marcar igl 1:0. Suenter quei gol vegnan las giugaduras da Mels allertas. Per nossas damas eis ei grev d’anflar ina finiziun. Ella 37avla minuta sto il goali da Mels puspei sestender. Cun in ferm e bi siet da Nicole Lechmann mida il resultat per pauc buc sin 2:0. Era suenter quell’acziun sentin nus dapli squetsch dalla vart da Mels. Ord il smugl anfla Anna-Lea la via tochen avon gol, lai davos ella giugaduras da Mels e setta cun tutta perschuasiun sin gol. Tgei schanza! Suenter quell‘ acziun vegn ei malsegir ella da sedisch dallas damas dall’USSI. Barbara e Nadine vegnan denton da far uorden e da sittar il ball ord prighel. La nervusadad dallas giugaduras sentan ins sil e sper il plaz. Buc ditg suenter quella suada vegn Mels tier la proxima schanza e marchescha igl 1:1.
Suenter pausa havein nus puspei tancau energia per dar tut las proximas 45 minutas. Gia ella 50avla suonda il culp liber che Tatjana surpren. Ord rodund 20 meters va il ball cnapp sur il gol ora. Dudisch minutas pli tard va ei liber: Il goali da Mels sebetta puspei e peglia il ball che Shannon leva marcar. Cuort suenter vegn Svenja tier la proxima schanza, mo era cheu ei il goali da Mels el dretg liug. Suenter quellas schanzas quenta ina caussa: BUC DAR SI! E che tuttas giugaduras dall’USSI tratgan il medem selai mussar tier la proxima acziun. Tatjana surpren il corner e setta perfetg en direcziun gol. Il baun da reserva era gia semtgaus per giubilar il 2:1. En quei mument vegn il ball anavos tier Tatjana e lezza studegia suenter buc secunda e setta cun perschuasiun e fermezia sin la rucla e vegn aschia da marcar il meritau 2:1! Las proximas minutas sgolan ed ei schabegia buca propi las massas. Vonzei vegn ei puspei malsegir en nossa da sedisch e Mels nezzegia quella caschun e setta, 2:2. Quei laian las damas dall’USSI buca plascher e muossan immediat agl adversari tgi che va oz cun treis puncts a casa. Aschia vegn Lara ella 81avla minuta da marcar il 3:2, bellezia! Suenter quell‘ attacca vegn ei segirau giu dapertut dalla vart dall’USSI ed ei vegn spitgau sin la schulada digl arbiter.
E sco vuliu e giavischau serendin nus a casa cun treis puncts sil conto. Quella notg havein nus tuttas semiau da 20 puncts e plaz dus sin la tabella! Ditg vegnan las damas denton buc da serevegnir. Gia sonda, ils 18 da matg allas 14:00 va ei puspei liber encunter las damas da Cuera.
Per l’USSI: da Silva Martins Barbara, Hubert Laura, Hubert Sarah, Hubert Nadine, Spescha Lorena, Schmed Selina, Demont Sina, Darms Tatjana (C), Lechmann Nicole, Spescha Anna-Lea, Peng Lara
Reserva: Columberg Ornella, Tomaschett Svenja, Fetz Shannon
Rapport: Columberg Ornella