Schluein Glion spiarda encunter il capogruppa

Encunter in ferm adversari spiarda Schluein Glion per l’emprema gada a casa suenter ina atgnamein gnanc aschi mala prestaziun. Las reservas dil club dalla Challenge League han denton mussau ch’ellas ein scoladas bein, san dar spert ed exact ballapei ed ein era effectivas en nezegiar lur caschuns da marcar gols. Ulteriuramein han ils giugadurs dil Principadi dil Liechtenstein era perdunau negins sbagls dils giugadurs da miez e dils defensurs indigens. Las empremas vegn minutas dil giug ein stadas ualti ulivas, lu ha Vaduz surpriu il domini dil giug ed aunc inagada alzau la cadenza. Tier il 0:1 ei Ismael Adejumo vegnius lantschaus en la gassa ed ha battiu Flurin Capaul cun in siet el cantun bass. Il 0:2 ei curdaus suenter l’emprema buna caschun per Schluein Glion – il siet cul tgau da Linus Tschalèr ei denton vegnius bloccaus dil goli – cun ina cunterattacca ed in siet da distanza deviau dad Andrin Netzer. Il 0:3 ha il spert e movibel attaccader Ardit Destani sittau suenter ch’el ei vegnius lantschaus ideal en la gassa.

Suenter la pausa ei il giug lu puspei staus ualti ulivs entochen en la 72avla minunta. En quella ei puspei Ardit Destani mitschaus alla defensiun e ha marcau il 0:4. Sis minutas pli tard eis ei lu gartegiau a Schluein Glion da sittar il gol dalla honur. Sin in corner da Livio Derungs ha Murat Leblebici diregiu la balla cul tgau avon il gol, nua che Aron Büchler ei seglius il pli ault e ha sittau ella en la reit. Cuort avon la fin ha lu Sascha Dokic stuschau la balla ord cuorta distanza da gol en al resultat final suenter in pass travers dil meglier giugadur sil plaz Ardit Destani.

US Schluein Glion – FC Vaduz 2  1:5 (0:3)

Crap Gries. – 225 aspectaturs. – AR: Imfeld

Gols: 21. Adejuma 0:1, 26. Netzer 0:2, 36. Destani 0:3, 72. Destani 0:4, 78. Büchler 1:4, 87. Dokic 1:5.

Schluein Glion: Capaul; Dermont, Matthias Derungs (83. Frias), Gian Sgier, Büchler; Gomes Machado (61. Vinzens), Livio Derungs, D’Atria (72. Michel), Bundi; Tschalèr (77. Leblebici), Lekishvili.

Vaduz 2: Öhri; Seifert, Hilti, Rahimi, Behluli (43. Spasojevic); Schädler (69. Alushaj), Kling (46. Hoti), Netzer (62. Vasanthan); Beck, Adejumo (77. Dokic), Destani.

Remarcas: Cartas mellnas:  75. Vasanthan (foul).  – Schluein Glion senza Gianluca Casutt, Egger e Gallmann (tuts blessai). – Corners: 3:8.