Schluein Glion: Remis encunter il capogruppa

En igl emprem giug dalla secunda runda ha l’equipa das Schluein Glion mussau ina buna prestaziun e recaltgau in punct encunter il capogruppa Mels. Cun in tec dapli saung freid fuss schizun dapli stau pusseivel. La finala han ils da casa denton stuiu esser cuntents cun quei punct, quei suenter turbulentas davosas minutas cun ina carta mellen/cotschna e pulit bia hectica sil plaz e sin ils bauns da reserva. L’entschatta per migliurar il plaz en la tabella ei denton dada.

Il giug ha entschiet mal per Schluein Glion. Gia en la sisavla minuta ha Serafin Bundi deviau in culp liber ord il miez dil plaz cul tgau en l’atgna reit ed aschia lubiu als hosps dad ir en avantatg. L’equipa da casa che ha giugau naven dall’entschatta cun ils treis novs giugadurs Sattar Afzali, Marino Cavegn e Rafael Deplazes ha denton nuota schau demoralisar da quella frida e priu il giug enta maun. Ella 23avla minuta ha Cavegn lantschau Deplazes cun in bellezia pass en la profunditad, il goli da Mels ha denton teniu il siet dil spert attaccader cun bravura. Tschun minutas pli tard ha el denton buca pli saviu evitar l’egalisaziun. Ei ha denton duvrau persuenter in penalti suenter in foul en la zona da puniziun dils hosps. Andri Michel ha sittau il penalti ferm e segir el cantun ault.

En igl emprem quart ura suenter pausa han omisduas equipas giu mintgamai duas bunas caschuns da marcar in gol. Ton a Bundisco era a Tiziano Vinzens eis ei denton buca gartegiau da batter il goli dils hosps ed era Marco Kalberer e Jindrich Strehlik han buca surmontau Flurin Capaul, il qual ha cunzun encunter Kalberer reagau fetg bein. Aschia eis ei stau entochen alla fin tier il pari. In pari encunter il capogruppa ei segir buca mal, mo la situaziun da tabella pretenda da Schluein Glion victorias per mitschar dalla relegaziun.

US Schluein Glion – FC Mels 1:1 (1:1)

Crap Gries. – 245 aspectaturs. – AR: Reuteler

Gols: 6. Autogol (Bundi) 0:1; 28. Michel 1:1 (penalti).

Schluein Glion: Capaul; Dermont (72. Gallmann), Sgier, Livio Derungs, BĂŒchler; Cavegn, Michel, Bundi (65. Coray); Deplazes, Afzali, Vinzens.

Mels: Samuel MĂŒller; Marthy, Gurzeler, Tscherfinger ( 85. Nicolin Gantenbein), Lipovac (46. Willi); Gartmann, Kalberer (88. Pablo MĂŒller), Wildhaber; Bleisch (67. Stump), Stehlik, Kohler.

Remarcas: Cartas mellnas:  11. Lipovac (foul), 40. Cavegn (foul), 78. Tscherfinger (foul); 85. Gartmann (malsportadad), 88. Dermont (reclamar).   – Carta mellen/cotschna: 90.  Cavegn (foul). – Carta cotschna: 90.+2 Cavegn (trenader); Schluein Glion senza Gianluca Casutt, Matthias Derungs, Nico D‘Atria (blessai), Hornacek, Cabalzar, Violi (absents) – Corners: 5:6.

Fotos: DuĆĄan Weigl