Era el secund giug a casa dalla runda da primavera ha ei buca tunschiu a Schluein Glion per ina victoria! En in giug cun pauc bialas cumbinaziuns da omisduas varts han las duas equipas partiu ils puncts, per Schluein Glion che stuess exnum far puncts per migliurar il plaz en la tabella ei quei dus puncts memia pauc, Abtwil-Engelburg ch’ei rangaus el miez dalla tabella vegn ad esser cuntents cun quei punct.
Per inagada eis ei gartegiau a Schluein Glion da buca incassar all’entschatta dil giug in gol, mobein dad ir en avantatg. Rafael Deplazes ei vegnius frenaus en la zona da puniziun cun in foul e ha gest sittau sez il penalti bass e segir sper il goli vi en la reit. Mo ina minuta pli tard ha Abtwil-Engelburg denton saviu egalisar. Suenter in siet en la latta traversa ha Temsegen Sabit reagau il pli spert e spediu la balla cun il tgau en gol.
La secunda mesadad han ils da casa stuiu entscheiver en senza Rafael Deplazes e Tiziano Vinzens che ein omisdus curdai ora muort blessuras. Ed ei ha buca entschiet en bein per Schluein Glion: gia en l’emprema minuta ha David Hornacek piars ordvart dalla zona da puniziun la balla e dau la caschun a Reto Nef da sittar ella el gol vit al 1:2. Ei ha duvrau in bien mument entochen che l’equipa ch’ei vegnida menada en quei giug da Patric Casutt ha magunau quella frida. Ils hops han giu en quella fasa ina, duas pusseivladads da sittar in ulteriur gol, quei ei denton buca gartegiau. En la 82avla minuta eis ei persuenter gartegiau a Schluein Glion d’egalisar ed aschia recaltgar silmeins in punct. Murat Leblebici ha tuc cun in siet cul tgau sin ina flanca neu dalla vart dretga mo la petga traversa, la balla rebatida ha Marino Cavegn sittau da gol en.
US Schluein Glion – FC Abtwil-Engelburg 2:2 (1:1)
Crap Gries. – 190 aspectaturs. – AR: Aliji
Gols: 14. Deplazes 1:0 (penalti); 15. Sabit 1:1; 46. Nef 1:2; 82. Cavegn 2:2.
Schluein Glion: Hornacek; Egger (33. Gallmann), Gian Sgier, Livio Derungs, BĂĽchler; Cavegn, Michel, Vinzens (46. Leblebici), Deplazes (46. Coray); Afzali, Stabile (89. Andri Sgier).
Abtwil Engelburg: Altermatt; Gehrig, Sturzenegger (77. Messmer), Klarer, Isler; Spescha, Nef, Renato Gröli (75. Reich), Koller (63. Ledergerber); Mattias Gröli, Sabit.
Remarcas: Cartas mellnas: 18. Egger (foul), 44. Altermatt (foul), 54. Gian Sgier (foul); 66. Derungs (foul), 90. Leblebici (foul), 90.+ 4. Messmer (foul). – Schluein Glion senza Bundi, Gianluca Casutt, D’Atria, Dermont, Matthias Derungs (blessai), Cabalzar, Violi (absents) – Corners: 3:7.