Schluein Glion: senza sittar gols san ins buca recaltgar puncts

Encunter las reservas dil club dalla Challenge League havess Schluein Glion senz‘auter saviu recaltgar puncts. Mo sch’ins vul recaltgar puncts ston ins sittar gols e quei ei buca gartegiau dumengia vargada el Principadi da Lichtenstein. Bein ha Schluein Glion giu quater, tschun bunas occasiuns da sittar gols, quellas ein denton tuttas vegnidas munchentadas, aschia ein ils puncts restai a Vaduz che ha nezegiau sias duas meglieras caschuns en l’emprema mesadad. Omiduas gadas eis ei gartegiau cun in’attacca sur il miez dil plaz; l’emprema gada cun in pass en la gassa sin igl attaccader, la secunda gada cun pigliar giu in culp naven dil gol e lantschar immediat la cunterattacca.

Per Schluein Glion ha Marino Cavegn giu en la 10avla minuta l’emprema schanza. Siu culp cul tgau ei denton vegnius frenaus dil goli da Vaduz ed en la 29avla minuta ei Sattar Afzali vegnius impedius el pli davos mument d’in adversari da sittar la balla en la reit. En las davosas diesch minutas da giug havessan ils gols per Schluein Glion stuiu curdar, enteifer mo treis minutas ha l’equipa giu treis bunas occasiuns. Igl emprem ha il goli teniu in siet ord cuorta distanza da Gian Sgier miraculusamein. Cuort sissu ha el era teniu in siet da Cavegn e mo ina minuta pli tard ha Sgier sittau la balla ord fetg buna posiziun sur gol ora enstagl en gol, aschia ei il giug ius alla fin senza che l’equipa da Schluein Glion ei vegnida da sittar in gol.

Ussa suondan aunc tschun giugs per l’equipa sursilvana, sch’ella vul aunc mitschar dalla relegaziun ha ei num d’entscheiver immediat a recaltgar puncts. Il meglier gia sonda proxima a casa a Crap Gries encunter Domat.

FC Vaduz 2 – US Schluein Glion 2:0 (2:0)

Rheinpark, Vaduz. – 85 aspectaturs. – AR: Lisci

Gols: 8. Bekteshi 1:0; 45.+1. Leka 2:0.

Vaduz 2: Foser; Rahimi, Hilti, Oberer (46. Tschupp, 71. Weber), Seifert (71. Vasanthan); Bekteshi,  Kling, Beck, Behluli; Leka (46. Adejumo), Hoti (71. Luque Notaro) .

Schluein Glion: Capaul; Gallmann (85.Casutt), Coray, Sgier, BĂŒchler; Cavegn, Michel (56. Leblebici), Livio Derungs, Egger; Vinzens (56. Stabile), Afzali

Remarcas: Cartas mellnas:  33. Bekteshi (foul), 90.+2. Weber (foul).   â€“ Schluein Glion senza Bundi, Deplazes, Dermont, Matthias Derungs (tuts blessai), Cabalzar (trenament da preparaziun), Violi (absents).  â€“ Corners: 4:5.