L’emprema equipa da Schluein Glion ha ina clara finamira per la stagiun da ballapei vegnenta. «Nus lein returnar ella 2. ligia regiunala», di il cautrenader Corsin Cavegn. Gia egl emprem giug encunter Triesen vul la squadra dalla Foppa mussar sias ambiziuns cun plirs giugadurs novs.
Questa fin d’jamna entscheiva il campiunadi da ballapei regiunal. Suenter la relegaziun da Schluein Glion ha la Surselva negina squadra pli ella 2. ligia regiunala. Sco igl onn vargau dattan duas ella 3. ligia: Trun/Rabius e Schluein Glion; la squadra da Lumnezia era vegnida relegada la primavera ella 4. ligia.«Relegaziun disgraziada»
Ils responsabels dall’Uniun sportiva Schluein Glion plaidan d’ina relegaziun disgraziada la primavera vargada. «Cul cader che stat a disposiziun a mi quest atun fuss quei buca succediu», di Corsin Cavegn che trenescha l’emprema squadra dapi igl october vargau. Da niev ella formaziun ein Lars Caduff (anavos d’Eschen Mauren), Carlo Bearth (anavos da Cuera 97) e Laurin Zala (dil CB Domat) che habitescha a Trin. Dall’atgna partiziun da juniors A vegn Luca Stabile. Midadas dat ei era tiel team da trenaders. Sper Corsin Cavegn e Patric Casutt ei Daniel Caduff da niev responsabels per la cundiziun. Pigl emprem giug dumengia suentermiezdi a casa encunter Triesen deplorescha Corsin Cavegn dus giugadurs ch’ein aunc en reconvalescenza, numnadamein Tiziano Vinzens e Sattar Afzali. Treis ulteriurs giugadurs mauncan ell’emprema scuntrada pervia d’absenza. «Las prestaziuns els giugs da preparaziun ein stadas bunas ed els trenaments treis ga per jamna essan nus adina stai denter 16 e 20 giugadurs», di Corsin Cavegn enviers la FMR. Quei seigi ina buna premissa per las preparativas. En giugs da preparaziun ha Schluein Glion denter auter battiu la squadra da 2. ligia da Mels cun 7:3. Il giug dil Cup svizzer la davosa fin d’jamna ei vegnius spiars encunter l’equipa da 3. ligia da Diepoldsau-Schmitter, mo quei pér suenter ina liunga lutga da penaltis.Attenziun al trenament
Dapi igl unviern vargau ei tut vegniu aunc pli professiunal ell’equipa da Schluein Glion. Dapi lu vegnan ils giugadurs e responsabels numnadamein cussegliai d’ina interpresa specialisada sigl entir cumplex naven dils trenaments entochen la vivonda. «Ils giugadurs ein fascinai da quei sistem, respectivamein dils cussegls ch’els han survegniu da 80’20. Probablamein ha quella filosofia da trenament e vivonda era in effect sin blessuras, il mument havein nus veramein fetg bien en quei grau», constatescha Corsin Cavegn che menziunescha en quei connex surtut il nutriment: «Ils giugadurs miran sin quel avon e duront ils trenaments e giugs.» Suenter in strapaz sportiv seigi la vivonda decisiva per serevegnir spert.L’unitad ei la sfida
Malgrad las bunas preparativas, la disciplina els trenaments sco era il rinforz entras plirs giugadurs novs constatescha Corsin Cavegn tonaton aunc in potenzial da migliur: «Impurtont eis ei ussa d’unir ils giugadurs sil plaz. La qualitad ei segiramein avon maun, uss stuein nus aunc vegnir megliers el giug senza bal. Quei vul dir seporscher al giugadur che ha il bal ni era sefar libers digl adversari. Mo lu era d’esser pli agressivs ed empruar consequentamein da reconquistar il bal. Cun auters plaids: uss stuein nus empruar da transferir la qualitad en in giug intelligent.» Ensemen culs dus caus pil sport Urs Casutt e Beat Dermont ed ils ulteriurs responsabels dall’uniun ha Corsin Cavegn la finamira da dominar la stagiun vegnenta dalla gruppa 1 dalla 3. ligia: «Igl ei communicau claramein che nus veglien contonscher la promoziun ella 2. ligia regiunala. Per contonscher quella finamira stuein nus probabel recaltgar rodund 55 da 66 puncts pusseivels. L’entschatta lein nus far dumengia suentermiezdi encunter Triesen.» Quella finamira seigi en mintga cass realistica cun quei cader: «Sche quels giugadurs fussen stai a disposiziun a mi la primavera fussen nus mitschai dalla relegaziun. Uss eis ei denton aschia e la realitad ei semplamein quella, che contonscher ina promoziun ei adina pli grev che da mitschar dalla relegaziun.» Interessanta astgess quella stagiun era vegnir perquei che la gruppa 1 dalla 3. ligia consista da pliras equipas che han dau igl onn vargau ella gruppa 2 ed ein cheutras pli u meins nunenconuschentas per Schluein Glion, mo era per Trun/Rabius.
Il trenader dall’emprema equipa da Schluein Glion, Corsin Cavegn, ei fetg optimists pil campiunadi da ballapei regiunal 2022/23. La finamira dalla squadra ei la promoziun dalla 3. ella 2. ligia regiunala.
Text: Hans Huonder, La Quotidiana