Schluein Glion gudogna il derbi encunter Trun/Rabius

Gia el secund giug da campiunadi ein las duas equipas sursilvanas semiseradas sonda vargada a Crap Gries. Avon ina biala culissa da varga 400 aspectaturas ed aspectaturs ha Schluein Glion saviu gudignar la partida cun in gol differenza, Trun/Rabius ha denton mussau in giug engaschau ed ha cumbattiu entochen la fin per egalisar il resultat.

La partenza el giug ei reussida meglier als hosps dalla Cadi. Gia en la tschunavla minuta ha Patrizio Decurtins sittau il 0:1 ord cuorta distanza. Suenter ina flanca dalla vart seniastra eis el vegnius emblidaus cumplettamein dalla defensiun indigena. Schluein Glion ha reagau vehement sin quella frida. Duas minutas pli tard ei Laurin Zala mitschaus cun sia spertadad da siu adversari, ha denton tuc cun siu siet mo la petga. En la endischavla minuta ei il 1:1 denton curdaus entras Lars Caduff. Cul tgau ha el sviau ina flanca d’Aron Büchler en la reit. Suenter quei furioso ei il giug secalmaus. Trun/Rabius ei seretratgs empau en lur mesadad ed ha empruau siu cletg cun cunterattaccas, Schluein Glion ha encuretg cuntinuadamein la via al gol, la precisiun dils pass finals e dallas flancas ei denton stada insufficienta. En la 32avla minuta ha il defensur Gian Sgier perquei priu sez las hottas enta maun. Cun la balla vid il pei eis el curius anavon e siu siet da distanza ei vegnius deviaus dalla defensiun da gol en, il goli ei aschia vegnius pigliaus contre-pieds.

La partenza en la secunda mesadad ei puspei gartegiada meglier a Trun/Rabius. En la 52avla minuta ha Patrizio Decurtins giu la gronda schanza d’egalisar sil pei. Suenter in pass dall’ala seniastra ha el ord cuorta distanza saviu sittar, il goli da Schluein Glion, Flurin Capaul, ha denton mussau ina grondiusa parada e pescau la balla ord il cantun bass dretg. Entochen alla fin ei il giug silsuenter staus ulivs senza biaras grondas caschuns da sittar gols. Igl ei semussau ch’in derbi viva cunzun dil cumbat.

A Schluein Glion ei la partenza en il campiunadi reussida cun quella secunda victoria, a Trun/Rabius che ha spiars duas gadas cun in gol differenza, buca. La prestaziun mussada a Crap Gries dall’equipa dalla Cadi ei denton stada empermettenta e vegn bein a purtar fretg els proxims giugs.

US Schluein Glion – CB Trun/Rabius 2:1 (2:1)

Crap Gries. – 425 aspectaturs/-as. – AR: Imhof.

Gols: 5. Decurtins 0:1; 11. Caduff 1:1, 32. Sgier 2:1.

Schluein Glion: Capaul; Dermont (58. Coray), Casutt, Sgier, Büchler; Michel; Derungs (86. Bearth), Cavegn, Zala (58. D’Atria), Cabalzar (69. Vinzens); Caduff.

Trun/Rabius: Schmed; Maissen, Ramon Orlik, Sandro Orlik (88. Alig); Mirco Pfister, Flepp, Denis Monn (68. Muoth), Daniel Pfister (46. Orlando Monn); Derungs (73. Stagliano), Alig (46. Robin Monn), Decurtins.  

Remarcas: Cartas mellnas: 60. Sgier (foul); 63. Denis Monn (foul), 73. Robin Monn (foul), 84. Coray (foul), 90. Vincenz (trenader Trun, reclamar). – Schluein Glion senza Afzali, Deplazes, Matthias Derungs (reconvalescents), Bundi, Egger, Gallmann (absents), Stabile (malsauns); Trun/Rabius senza Cathomas, Caduff, Janka, Pascal Schmed (blessai).  – 7. siet en la petga Schluein (Zala), 90. Siet en la petga Schluein (Cavegn). – Corners: 6:3.