Cun ina prestaziun solida e cunzun disciplinada gartegia ei a Schluein Glion da gudignar il giug encunter il club da ballapei da Ruggell. L’equipa ch’ei era vegnida relegada questa stad dalla secunda en tiarza ligia e che ha gudignau ils emprems tschun giugs dil campiunadi 2022/23. Per l’emprema gada en questa sesiun eis ei era gartegiau a Schluein Glion da survegnir negins gols, quei ch’ei stau il fundament per la victoria en in giug intensiv sin in terren bletsch e grev.
Naven dall’entschatta han ils hosps dil Principadi dil Lichtenstein giu empau dapli dil giug, senza denton saver crear bunas occasiuns per sittar in gol. Era l’equipa da Schluein Glion ei cun sias spertas cunterattaccas buca vegnida fetg malsegira en la zona da puniziun. Aschia croda igl emprem gol plitost surprendentamein en la 37avla minuta. Laurin Zala seglia ensemen cun in defensur sin ina flanca dall’ala seniastra e meina la bala plitost cul dies che cul tgau davos da gol en. Cuort avon la pausa fuss ei bunamein gartegiau a Schluein Glion d’alzar il resultat. Suenter in culp liber ei la balla vegnida rebattida a Serafin Bundi che ha sittau direct, il goli da Ruggell ha deviau il siet ferm en la latta e da leu ei la balla curdada avon la lingia da gol. Donn.
Suenter pausa han las numerusas aspectaturas ed ils numerus aspectaturs viu pli u meins il medem giug sco all’entschatta. Ils hosps ein stai pli bia en possess dalla balla, malsegir en la zona da puniziun ein ei denton vinavon strusch vegni. Sulettamein ina roscha corners han els astgau sittar, ils quals han era buca purtau fretg. Allas cunterattaccas da Schluein Glion ha vinavon l’exactadad el davos pass muncau. Cura che tut ils presents spitgavan sin il schul final dil bien arbiter ei lu tuttina aunc in gol curdaus e quei per l’equipa da casa. Simon Gallmann ha cavau ora e defendiu ina balla ora en l’ala dretga ed ei vegnius da sittar ella bass en la zona da puniziun, nua che Tiziano Vinzens ha buca targlinau e sittau la balla el cantun bass seniester.
US Schluein Glion – FC Ruggell 2:0 (1:0)
Crap Gries. – 324 aspectaturs/-as. – AR: Vrsajkovic.
Gols: 37. Zala 1:0; 90. + 5. Vinzens 2:0.
Schluein Glion: Capaul; Dermont, Coray, Derungs, Büchler; Sgier; Zala (68. D’Atria), Bundi (46. Vinzens), Afzali (85. Gallmann), Michel; Caduff (90. + 4. Egger).
Ruggell: Dietsche; Simon Maag, Ducak, Stefan Maag (63. Kilian Büchel), Lukas Büchel; Kollmann; Risch (73. Allgäuer), Özcan, Ospelt, Haas; Schreiber.
Remarcas: Cartas mellnas: 38. Zala, 42. Bundi, 45. Stefan Maag, 81. Lukas Büchel (tut per fouls). – Schluein Glion senza Bearth, Cabalzar, Cavegn, Deplazes, Matthias Derungs, Stabile (blessai ni absents). – 45. siet en la traversa Schluein (Bundi). – Corners: 2:8.