Schluein Glion gudogna senza difficultads

Cun ses gols numra 12, 13 e 14 en questa sesiun decida Lars Caduff il giug encunter la secunda equipa dil club da ballapei d’Eschen-Mauren gia en l’emprema mesadad. L’equipa da casa ha strusch giu in’occasiun da sittar in gol duront igl entir giug ed ei stada cuntenta da buca survegnir pli bia gols suenter la pausa. Pusseivladads per alzar il resultat havessan ils giugadurs da Schluein Glion giu numerusas!

Suenter tschun minutas haveva il club da ballapei da Schluein Glion gia giu pliras bunas caschuns da marcar gols ed el menava era gia cun 2:0. Gia en la secunda minuta ha Aron Büchler deviau in corner ord cuorta distanza en gol e suenter mo tschun minutas ha Lars Caduff sittau in penalti el cantun bass, suenter ch’el era vegnius mess a tiara en la zona da puniziun. En quei stil eis ei iu vinavon. Schluein Glion ha giu schanzas en abundonza per alzar il resultat, las qualas ein denton tuttas vegnidas munchentadas. En la 21avla minuta ha Eschen Mauren scursaniu il resultat, practicamein cun sia emprema attacca seriusa. Suenter in siet da cantun ha il defensur Raphael Goop sittau cul tgau la balla en la reit. Quei ei denton mo stau in cuort intermezzo offensiv dalla equipa indigena. Silsuenter ha ella puspei stuiu seconcentrar da buca schar alzar Schluein Glion il resultat. Quei ha funcziunau detg bein entochen cuort avon pausa. Lu ha Lars Caduff puspei surpriu la reschia dil giug e sittau en mo treis minutas dus ulteriurs gols. Inagada eis el vegnius survius da Serafin Bundi neu dalla vart seniastra e la secunda gada da Gian Sgier neu dalla vart dretga.

Dalla secunda mesadad dat ei da scriver nuot. Schluein Glion ha empruau d’alzar il resultad, quei ei buca reussiu. Eschen Mauren ha cumbattiu per buca survegnir dapli gols, quei ei reussiu.

USV Eschen-Mauren – US Schluein Glion 1:4 (1:4)

Plazza da sport Eschen. – 125 aspectaturs/-as. – AR: Kojadinovic.

Gols: 2. Büchler 0:1, 5. Caduff 2:2, 21. Goop 1:2, 40. Caduff 1:3, 43. Caduff 1:4.

Eschen-Mauren: Carigiet; Goop (66. Levin Ritter), Weibel, Riberio de Sousa (46. Bayram), Warren Kaiser (43. Gabelmann); Marxer (66. Demirel), Nicolas Kaiser, Kolb, Zivanovic (50 Kaufmann); Yannick Ritter, Hilti (66. Bayraktar).

Schluein Glion: Capaul; Dermont, Coray (46. Casutt), Derungs, Büchler; Sgier (66. Egger), Michel (46. Bearth); Zala (66. Gallmann), Bundi (75. Michel), Afzali; Caduff.

Remarcas: Cartas mellnas: 25. Büchler, 69. Levin Ritter, 72. Kaufmann, 78. Demirel (tut per fouls). – Schluein Glion senza Cabalzar, Cavegn, Deplazes, Matthias Derungs, Stabile, Vinzens (blessai, malsauns ni absents).  – Corners: 3:5.