Cun stentas e fadigias ha l’equipa da Schluein Glion recaltgau la sonda sera a Crap Gries treis ulteriurs puncts encunter il davos dalla tabella, quei denton senza mussar ina prestaziun grondiusa. Igl ei plitost stau ualti magher quei ch’ei vegniu presentau allas aspectaturas ed als aspectaturs, mo la finala quentan mo il treis puncts.
Da bellezia relaziuns ha Schluein Glion surpriu naven dall’entschatta il domini dil giug e sfurzau igl adversari en la defensiun. Duas grondas schanzas (Marino Cavegn e Lars Caduff) ed in ferm siet da distanza en la traversa (Serafin Bundi) ein denton stadas las sulettas acziuns offensivas dalla emprema mesadad che valan da vegnir menziunadas.
Il trenader da Schluein Glion ha reagau da pausa ed ha midau en dus giugadurs offensivs (Sattar Afzali e Tiziano Vinzens), ils quals han lu era procurau per empau veta avon il gol digl adversari. Mo igl emprem fuss bunamein Buchs 1b ius en avantatg! Cuort suenter la pausa ei numnadamein Callum Ormond mitschaus alla defensiun e siu siet ha per cletg tuccau mo la petga. En la medema minuta ei Lars Caduff vegnius lantschaus dalla vart dretga ed el ha surviu la balla perfetgamein a Sattar Afzali che steva tut persuls avon il gol. Aschia ha il giuven attaccader strusch saviu munchentar da marcar il 1:0. Mo treis minutas pli tard ha Tiziano Vinzens giu la gronda pusseivladad d’alzar il resultat, ord cuorta distanza ha el denton sittau la balla lunsch sur il gol ora, strusch da crer! En la 55avla minuta eis ei lu veramein reussiu a Buchs 1b d’egalisar. Philipp Kolbe ha plazzau in culp liber da bien 25 meters exact el cantun ault dretg ed aschia battiu Flurin Capaul che ha schiglioc buca giu bia da far en quei giug. Sin quei gol ha Schluein Glion reagau cun marcar il 2:1 entras Lars Caduff. El ei vegnius survius da Carlo Bearth che ha enstagl alzar la balla cun in culp liber en la zona da puniziun, stuschau ella ruffinau sper il mir vi al caposettagols. Lez ha buca schau supplicar e sittau la balla ferm ed exact el cantun bass al resultat final.
US Schluein Glion – FC Buchs 1b 2:1 (0:0)
Crap Gries. – 210 aspectaturs/-as. – AR: Wanjek.
Gols: 47. Afzali 1:0; 55. Kolbe 1:1, 61. Caduff 2:1.
Schluein Glion: Capaul; Dermont, Coray, Derungs, BĂĽchler (67. Casutt); Sgier, Michel (46. Vinzens), Cavegn (36. Zala), Bundi (46. Afzali); Caduff.
Buchs 1b: Wood; Ugrica (86. Oesch), Wirth, Kolbe, Schäpper; Kormany Levente (77. Secli), Pavlov, Brunettini, Ormond, Sibona (57. Jakupi); Bieri.
Remarcas: Cartas mellnas: 29. Sibona (reclamar), 70. Schäpper (foul), 74. Bieri (relcamar), 78. Caduff (reclamar); 87. Ledetzky (trenader). – Carta mellen/tgietschen: 87. Bieri (foul) . – Schluein Glion senza Deplazes, Matthias Derungs, Egger (blessai ni absents). – 36. siet en la traversa Schluein (Bundi); 46. siet en la petga Buchs 1b (Ormond). – Corners: 2:4.