Sattar Afzali en la luna da sittar gols

La historia da quei giug ha il giuven attaccader da Schluein Glion, Sattar Afzali, scret. Buca meins che quater gadas ha el sittau la balla en la reit ed aschia decidiu il giug. Grond meret han denton era ses congiugadurs giu che han mintgamai lantschau el optimalmein.

Da cundiziuns idealas, era sch’il terren era empau grevs, suenter la ferma plievgia duront la notg sin la sonda, ha il giug entschiet fetg ulivs. Ils hosps da Schaan ein stai ualti agressivs ed han buca schau bia plaz a Schluein Glion da crear attaccas malsegiras. Aschia ha ei cuzzau bien 20 minutas avon ch’il giug ei vegnius pli interessants. Lu ha Afzali surpiu la reschia. En la 21avla minuta ha el dirigiu in culp liber en direcziun dil cantun ault, il qual ha strihau la traversa e treis minutas pli tard ha el sittau il 1:0. Bein survius da siu partenari en l’attacca, Lars Caduff, ha el plazzau la balla suveran sper il goli vi el cantun dretg. En la 36avla minuta ha Schaan giu sia megliera caschun da sittar in gol. Il siet da distanza da Helder Gonçalves ei denton rebattius dalla latta giu sin (forsa era dadens?) la lingia e lu anora, aschia ch’igl arbiter ha buca schulau. Tgisà tgei ch’il VAR havess getg?

Quei ei denton stau mo in cuort intermezzo offensiv dils hosps, pli biaras bunas caschuns da sittar gols ha la defensiun da Schluein Glion buca lubiu ad els duront igl entir giug. Mo ina minuta pli tard ha persuenter Afzali sittau siu secund gol, quella gada sun in siet plazzau el cantun ault.

Suenter pausa ha sco emprem Carlo Bearth alzau il score sin 3:0 e mussau ch’el sa aunc adina nua ch’il gols stattan a Crap Gries. Quei ei numnadamein stau siu emprem gol per l’USSI suenter siu retuorn si da Cuera 97. Cun quei gol ei il giug practicamein staus decidius. Dus ulteriurs gols dad Afzali en la 60- e 63avla minuta, omisdus sittai cun bia ruffinessa e saung freid, han denton aunc alzau il resultat e purtau all’equipa da Schluein Glion la otgavla victoria el novavel giug da campiunadi.

US Schluein Glion – FC Schaan 5:0 (2:0)

Crap Gries. – 215 aspectaturs/-as. – AR: Luman.

Gols: 24. Afzali 1:0; 37. Afzali 2:0, 53. Bearth 3:0, 60. Afzali 4:0, 63. Afzali 5:0.

Schluein Glion: Capaul; Gallmann, Coray, Derungs, Vinzens (67. BĂĽchler); Sgier (67. Egger), Michel, Bearth; Bundi (67. Zala), Caduff, Afzali (75. Cabalzar).

Schaan: Strunk; Matthias Quaderer (52. Joos), Eberle, Pereira, Ubavic; Fabio Quaderer, Öhri (67. Banzer), Mazreku, Licci; Gonçalves (46. Sobkova), Antunovic (83. Gonçalves).

Remarcas: Cartas mellnas: 48. Antunovic (foul), 61. Derungs (reclamar), 81. Eberle (foul). – Schluein Glion senza Cavegn, Casutt, D’Atria, Deplazes, Dermont, Matthias Derungs, Stabile (blessai ni absents).  â€“ 21. siet en la traversa Schluein (Afzali); 36. siet en la traversa Schaan (Gonçalves), 73. Siet en la petga Schluein (Zala). – Corners: 2:4.