A l’equipa da Schluein Glion eis ei buca reussiu la sonda vargada da batter l’equipa da Landquart, era sch’ella ha dominau igl entir giug. Quei denton senza vegnir tier bia bunas caschuns da marcar gols. Memia pauc tempo, memia pauca exactadad en las acziuns e memia pauca veglia da cumbatter han lubiu a Landquart da recaltgar in punct cun ina prestaziun defensivamein solida.
Gia en la tiarza minuta han ils hosps dil Segneradi sittau igl 0:1 entras Nando Oertli. El ha deviau in culp liber da gronda distanza levamein cul tgau ed ha aschia surmontau Alessandro Casutt, il qual ha per l’emprema gada pertgirau il gol da Schluein Glion en questa sesiun. Silsuenter ei l’equipa da Landquart seconcentrada da defender quei avantatg. L’equipa da casa ha consequentamein dominau ed empruau da dar ina sviulta al giug. Quei ei denton gartegiau mo a mesas, auter che ina roscha siets da cantun han las attaccas buc purtau. Ord in da quels siets da cantun fuss il 1:1 lu tuttina aunc bunamein curdaus cuort avon la pausa. Il siet cul tgau da Gianluca Coray ei denton aunc vegnius frenaus dad in defensur sin lingia.
Cun quater midadas da giugadurs ha il trenader da Schluein Glion reagau da pausa ed aschia aunc procurau per dapli dominanza sil plaz. Landquart ei strusch pli vegnius ord l’atgna mesadad, las attaccas da Schluein Glion ein denton buca vegnidas bia pli malsegiras. En la 57avla minuta ei silmeins l’egalisaziun tuttina aunc gartegiada. Laurin Zala che ha astgau giugar suenter la pausa en sia posiziun preferida dalla vart dretga ha reteniu in pass ord la defensiun da Landquart e dirigiu la balla cun in bi siet el cantun ault dretg. Tier quei pari eis ei restau entochen la fin, aschia che Schluein Glion ha piars dus ulteriurs puncts sil capogruppa Valposchiavo el davos giug da casa per questa sesiun.
US Schluein Glion – FC Landquart 1:1 (0:1)
Crap Gries. – 195 aspectaturs/-as. – AR: Dilemen.
Gols: 3. Oertli 0:1; 57. Zala 1:1.
Schluein Glion: Casutt; Gallmann (46. BĂĽchler), Coray, Derungs, Zala; Egger (46. Sgier), Michel (46. Cabalzar), Bearth; Bundi (46. Vinzens), Afzali; Caduff.
Landquart: Mayer; Hermle, Oertli, Martin, Sutter (67. Hashani); Candrian, Oswald, Lampert, Fausch, Madureira (Ribeiro); Pirovino.
Remarcas: Cartas mellnas: 61. Martin (foul), 71. Oertle (foul). – Schluein Glion senza Cavegn, Casutt, D’Atria, Deplazes, Dermont, Matthias Derungs, Stabile (blessai ni absents). – Corners: 12:1.