Schluein Glion: clara victoria denton senza brigliar

L’equipa da Schluein Glion parta cun ina clara victoria en la runda da primavera dil campiunadi dalla tiarza ligia. A Triesen gudogna la squadra da Corsin Cavegn cun 6:2 e muossa ch’ella ei sepreparada en uorden per la secunda part dil campiunadi. La prestaziun ei denton buca stada naven dall’entschatta entochen la fin briglianta. Malcapientschas en la defensiun han en las davosas 10 minutas era aunc lubiu alla equipa da casa da sittar dus gols ed aschia megliurar empau il resultat. 

L’entaschatta dil giug ei denton stada briglianta. Gia suenter 1 minuta e 17 secundas ha Lars Caduff sittau sin pass da Serafin Bundi igl emprem gol per Schluein Glion e mo bien ina minuta pli tard ha Bundi sittau il secund gol, sin pass da Caduff. Schluein Glion ha attaccau vinavon e schau als indigens negina caschun da vegnir el giug. L’equipa da casa ha stuiu esser leda da buca incassar dapli gols en l’emprema part dil giug. In tierz gol per ils hosps ha Triesen denton buca saviu evitar. Sittau il gol ha Marino Cavegn, il qual ei vegnius lantschaus en la zona da puniziun cun in pass rufinau da Carlo Bearth. Suenter quella entschatta furiusa ha l’equipa da Schluein Glion tschessau empau il tempo ed aschia dau als indigens la caschun d’era crear entginas attaccas, senza denton saver inquietar seriusamein la defensiun dils hosps.

Era la secunda mesadad ha Schluein Glion iniziau cun sittar in gol. Nando Cabalzar ei vegnius lantschaus en la zona da puniziun da Rafael Deplazes â€“ omisdus ein vegni midai en da pausa – ed ha battiu il bien goli da Triesen cun in siet precis al 0:4. Il proxim gol ei curdaus en la 69avla minuta cun in siet naven dil punct d’endisch meters. Lars Caduff ei vegnius mess a tiara agl ur dalla zona da puniziun ed ha gest sez procurau cun in siet ferm e plazzau el cantun bass dretg per il 0:5. Il giug ei aschia staus decidius definitivamein ed ils treis gols ch’ein curdai en las davosas diesch minutas – in per Schluein Glion entras Marino Cavegn e dus per Triesen entras Melvin Ender und Constantin Marxer – mo pli cosmetica.

FC Triesen – US Schluein Glion 2:6 (0:3)

Blumenau. – 95 aspectaturs/-as. – AR: Munian.

Gols: 2. Caduff 0:1; 4. Bundi 0:2, 18. Cavegn 0:3, 48. Cabalzar 0:4, 70. Caduff 0:5 (penalti), 82. Cavegn 0:6,  84. Hasler 1:6, 88. Marxer 2:6. 

Triesen: Andreas Kindle; Mathis (46. Marxer), TschĂĽtscher, Jonas Wolf, Preite (68. Ender); Ribeiro de Sousa (77. NeusĂĽss), Dominik Wolf, Salzgeber, Kenny Kindle (73. Sokoli); Toplu (58. BĂĽchel), Hasler. 

Schluein Glion: Capaul; Coray, Derungs (66. Casutt), Sgier, BĂĽchler; Michel (46. Cabalzar), Cavegn, Bearth (71. Dermont); Bundi (64. Zala), Vinzens (46. Deplazes); Caduff (73. Afzali).

Remarcas: Cartas mellnas: 50. Preite (foul), 57. Toplu e Bearth (malsportadad), 60. Jonas Wolf (foul), 62. Bundi (foul).  â€“ 23. siet en la petga da Kenny Kindle. – Corners: 1:6.