Schluein Glion: Vulviu il giug e tuttina buca gudignau

En in giug fetg emoziunal han Valposchiavo Calcio e Schluein Glion – il capogruppa e siu emprem persequitader en la tiarza ligia – partiu meritadamein la sonda vargada ils puncts sin il cuort e stretg plaz da ballapei artificial Cortini a Poschiavo. Ils indigens ein ü entras in penalti en avantatg, Schluein Glion ha vulviu il giug en la secunda mesadad, ha denton deplorablamein incassau mo ina minuta suenter il gol d’avantatg l’egualisaziun. En la fasa finala dil giug han omisduas equipas aunc giu occasiuns da marcar il gol dalla victoria. Quel ei denton buca curdaus, aschia che Valposchiavo Calcio resta alla testa dalla tabella cun dus puncts avantatg sin Schluein Glion. Ruggell e Triesenberg che han gudignau lur giugs ein ussa vegni empau pli datier e han mo pli treis e sis puncts disavantatg sil capogruppa.

L’equipa da Valposchiavo ha giugau naven dall’entschatta aschia sco ella dat gia dapi onns ballapei sil plaz Cortini: pass liungs direct dil goli ni dils defensurs sin ils gronds e rutinai attaccaders che emprovan lu da deviar la balla cul tgau, cul pĂšz ni schiglioc enzaco sin lur congiuadurs ni da provocar in foul ed aschia crear pusseivladads da marcar. Quei ha denton buca funcziunau tenor giavisch, cunquei che Schluein Glion era sepreparaus sin quella tactica da giug. L’equipa da Corsin Cavegn ha sespruau da baghegiar si il giug ord la defenisun e vegnir cun cumbinaziuns al success. Quei ch’ei denton era buca sempel, cunquei ch’il plaz ei, sco gia descret sisura, stretgs e cuorts ed ils giugadurs indigens ualti agressivs. Tuttina ha Schluein Glion giu l’emprema gronda caschun da marcar. Raffael Deplazes ei vegnius lantschaus suenter nov minutas ideal cun in pass en la profunditad ed ha saviu cuorer persuls encunter gol. Siu siet ha il goli indigen denton menau cul pei sper gol ora. En la 25avla minuta ei in ulteriur pass liung da Valposchiavo per ina gada buca vegnius attaccaus detschartamein dalla defensiun sursilvana, aschia che Mattia Merlo ei mitschaus dall’ala giu. Avon che saver dar la flanca eis el vegnius frenaus incorrectamein, aschia ch’igl arbiter ha schulau e mussau sil punct da penalti. Mattia Cathieni, in dils dus caposettagols da Valposchiavo, ha surpriu la resonsabladad e purtau sia equipa cun in ferm e plazzau siet el cantun bass en avantatg. Entochen alla pausa ei il giug ius en la medema moda e maniera vinavon, ils giugadurs han cumbattiu per mintga balla e mintga meter pastg (artificial!), propi bunas caschuns da marcar ein stai sin omisduas varts plitost raras. La megliera per Schluein Glion ha Marino Cavegn giu. Siu culp cul tgau sin ina biala flanca da dretg ei denton sgulas mo per pauc sur il gol ora. La megliera per Valposchiavo ha Mattia Cathieni giu, siu siet suenter in culp liber ha Flurin Capaul denton pescau cun ina grondiusa parada ord il cantun ault.

Suenter pausa ha Schluein Glion alzau la cadenza. Cunzun sur l’ala seniastra ha l’equipa fatg pli e pli gronda pressiun e caschunau aschia pli e pli grondas difficultads alla defensiun indigena. En la 61avla minuta ha ina sperta attacca sur la vart seniastra lu era purtau il gol dalla realisaziun. Plirs giugadurs ein stai involvai en l’attacca e la finala ha Aron BĂŒchler surviu la balla perfetg a Marino Cavegn, il qual ha sittau ella ord cuorta distanza el tschiel dalla reit. Schluein Glion ha ussa aunc vuliu dapli e cuntinuau ad attaccar, Valposchiavo ha vinavon sperau sin in bien mument d’in da ses attaccaders per decider il giug. Bunamein ina copia dil gol dall’egualisaziun ha purtau Schluein Glion en la 77avla minuta en avantatg. Puspei ein plirs giugadurs stai involvai, puspei eis ei iu spert e precis sur la vart seniastra, quella gada ha Raffael Deplazes dau il pass e final e Lars Caduff ha sittau la balla da gol en. La legria sur da quei gol ei stada gronda ton tier ils numerus amitgs dall’equipa che han accumpignau ella giu el sid dil cantun sco era tier ils giugadurs, aschia ch’els ein stai per in mument nunprecauts. Quei ha il meglier giugadur da Valposchiavo, Mattia Cathieni, nezegiau consequent. El ha mo ina minuta pli tard surpriu la balla dall vart dretga, ha menau ella encunter miez e sittau cun siu ferm pei seniester il dus a dus. Tier quei resultat eis ei restau entochen la fin. 

Valposchiavo Calcio – US Schluein Glion 2:2 (1:0)

Cortini, Poschiavo. – 140 aspectaturs/-as. – AR: Breu.

Gols: 26. Cathieni 1:0 (p.); 61. Cavegn 1:1, 77. Caduff 1:2; 78. Cathieni 2:2.

Valposchiavo: Viviani; Rossi (66. Gion Cortesi), Alessandro Fiorina, Massimiliano Fiorina, Cristiano; Del Campo (59. Menghini), Plozza (72. Oscar Cortesi), Merlo, Cathieni; Zugnoni (88. Rampa), Pola.

Schluein Glion: Capaul; Zala, Coray, Sgier, BĂŒchler; Kohler (66. Michel), Bearth, Vinzens (46. Afzali), Cavegn; Deplazes, Caduff.

Remarcas: Cartas mellnas: 20. Massimiliano Fiorina (foul), 29. Bearth (reclamar), 38. Del Campo (foul), 72. Cavegn (reclamar), 74. BĂŒchler (foul), 85. Michel (foul), 86. Menghini (foul), 87. Cathieni (malsportadad). – Schluein Glion senza D‘Atria, Matthias Derungs (reconvalescents), Alessandro e Gianluca Casutt, Dermont (absents).  â€“ Debut da Gion-Andrea Kohler tier Schluein Glion – Corners: 4:6.