Schluein Glion: puspei inagada in giug senza cuntergols

Senza pli grondas difficultads gudogna Schluein Glion treis ulteriurs puncts en in giug plitost ruasseivel senza stravagau biaras scenas che han schau sesalzar aspectaturas ed aspectaturs dils sezs. L’equipa da Domat 2 ei seconcentrada naven dall’entschatta da star defensiv compact e solid ed ei aschia duront l’entira emprema mesadad strusch sepresentada inagada en la zona da punziun da Schluein Glion. En la secunda mesadad han ils giugadurs da Domat ughegiau – la terrada avon ils egls – empau dapli ell’offensiva, dapli che in siet en la traversa han els denton buca cuntonschiu, aschia che Schluein Glion gudignau per la tiarza gada en quest campiunadi senza incassar in gol.

Gia suenter diesch minutas ei Schluein Glion ius entras Lars Caduff en avantatg. Andri Michel ei curius cun la balla sper dus defensurs ora ed ha surviu ella al caposettagols che ha stuschau la balla ord cuorta distanza da gol en. Silsuenter han ils indigens attaccau incuntin senza denton crear grondas occasiuns da sittar gols. Per cuort avon pausa ei il proxim gol curdaus. Plirs giugadurs ein stai involvai en ina cumbinaziun sperta e precisa atras il miez dil plaz e la finala ha Sattar Afzali furniu la balla perfetg a Rafael Deplazes che ha persuls avon il gol da Domat buca schau schanzas al davos um dils hops e sittau il 2:0.

Suenter pausa ei il giug pli u meins ius sin la medema moda e maniera vinavon. Schluein Glion ha attaccau, Domat 2 ha defendiu e mirau da buca vegnir memia sut las rodas. Quei ha l‘equipa denton fatg cun ussa era empruar da crear mintgaton sez acziuns offensivas. Ina da quellas acziuns havess bunamein purtau success, il siet da Alessio Sewer ei denton rebatius dalla traversa cuort avon che dus tiarzs dil giug ein stai terminai. Dapli che in fiug da strom ei quei denton buca stau. Cun siu secund gol ha Lars Caduff decidiu il giug en la siatontavla minuta definitivamein. Quella gada eis el vegnius survius perfetg da Luzi Dermont ch’ei mitschaus dalla defensiun dalla vart dretga siadora ed ha stuschau la balla travers sil pei al center miez.

US Schluein Glion – CB Domat 2 3:0 (2:0)

Crap Gries. – 255 aspectaturs/-as. – AR: Muscaritolo.

Gols: 10. Caduff 1:0; 39. Deplazes 2:0, 70. Caduff 3:0.

Schluein Glion: Capaul; Zala, Livio Derungs, Sgier (86. Coray), Gianluca Casutt; Michel, Cavegn, Afzali (53. Vinzens), Deplazes (77. Büchler), Bundi (46. Dermont); Caduff (79. Manetsch).

Domat 2: Innamorato; Fahling, Djermanovic, Pfister, Da Silva; Alessio Sewer, Alessio Iozzo, Cedric Sewer (81. Esa Ehrler), Bucek (69. Luck), Damian Sewer (81. Camenisch); Danilo Iozzo.

Remarcas: Cartas mellnas: 16. Galli (assistent trenader Domat per reclamar); 75. Deplazes (reclamar), 82.  Büchler (foul), 83. Danilo Iozzo (foul) – Schluein Glion senza D‘Atria, Matthias Derungs (reconvalescents), Bearth (serraus), Kohler (blessaus).  – 57. siet en la latta Domat (Alessio Sewer). – Corners: 5:4.