Schluein Glion piarda entras in gol en las davosas minutas

Gitg ha ei fatg la pareta sco sch’il giug denter il secund (Schluein Glion) ed il tierz en la tabella (Ruggell) termineschi cun in pari. Era sche omisduas equipas encurevan il gol dalla decisiun vuleva quel buca curdar. Ruggell ha tuc duas gadas la petga e duas gadas ha in defensur da Ruggell bloccau la balla el davos mument sin lingia da gol ed aschia buca schau ir en avantatg Schluein Glion. Cuort avon la fin ei il gol dalla victoria lu aunc tuttina curdaus, per ils indigens ed entras in culp liber.

Il giug denter las duas equipas che ein omisduas vegnidas relegadas igl onn vargau dalla secunda ligia ha entschiet fetg animau. Aspectaturas ed aspectaturs han sentiu che ton ils indigens sco era ils hosps vulevan per tut prezzi recaltgar puncts; Ruggell per buca piarder il cuntact cun ils emprems plazs en la tabella, Schluein Glion per far vinavon pressiun sin Valposchiavo Calcio che ei momentan alla testa. Suenter ina buna occasiun da marcar sin mintga vart ha ei en la 18avla minuta barschau sil pli ault avon il gol dils indigens. Il siet cul tgau da Laurin Zala sur il goli en ei denton vegnius spedius naven da lingia d‘in defensur el pli davos mument. En la cunterattacca ei lu surprendentamein igl 1:0 curdaus. Suenter ina balla liunga han goli e defensiun da Schluein Glion targlinau empau, aschia che Agim Zeqiri ha saviu surprender la balla e survir Nurkan Ibrahimi che ha plazzau ella sper il goli vi en la reit. 

Suenter pausa ha Schluein Glion immediat surpriu il domini dil giug e fatg gronda pressiun. Sin in dils numerus corners che l’equipa ha astgau sittar ei lu era il gol dall’egalisaziun curdaus. Sattar Afzali ha sittau la balla direct sin gol ed il davos um da Ruggell ei buca vegnius da frenar ella avon la lingia ed ha stuiu schar mitschar ella el cantun ault dretg. Quei gol ha dau ulteriur slontsch als hosps che han ussa encuretg la decisiun. La gronda occasiun da sittar en avantatg sia equipa ha Carlo Bearth giu en la 59avla minuta. Suenter in acziun sur pliras staziuns cun pass cuorts e precis ha el saviu sittar la balla ord cuorta distanza sin gol. El ha lu era pudiu surmontar il goli, mo puspei ha in defensur spediu la balla egl ultim mument giu da lingia. Silsuenter ei il giug puspei s’ulivaus ed ils indigens ein vegni meglier el giug. Duas gadas han els giu discletg cun tuccar mo la petga ed aschia buca ir sez en avantatg. Quei ei lu denton tuttina aunc gartegiau cuort avon la fin. Nurkan Ibrahimi ei vegnius frenaus avon al zona da punziun cun in foul ed ha sez surpriu da sittar il culp liber. Cun in siet ferm – che ei per la supresa dil goli ius atras il mir che la defensiun da Schluein Glion haveva tschentau – ha el purtau la victoria als indigens.

FC Ruggell – US Schluein Glion 2:1 (1:0)

Widau. – 170 aspectaturs/-as. – AR: Stauchle.

Gols: 20. Ibrahimi 1:0; 49. Afzali 1:1, 85. Ibrahimi 2:1.

Ruggell: Dietsche; Adejumo (Biedermann), Haas, Shala (86. Maag), Ducak (72. Fischer); Kollmann, Erne (79. Simonelli), Ospelt; Allgäuer, Zeqiri, Ibrahimi.

Schluein Glion: Capaul; Dermont (76. Gianluca Casutt), Coray, Sgier, Büchler; Bearth, Cavegn; Zala (46. Michel), Deplazes (86. Bundi), Afzali (76. Vinzens, 89. Derungs), Caduff.

Remarcas: Cartas mellnas: 31. Ospelt (foul), 35. Caduff (reclamar), 63. Afzali (reclamar), 84. Sgier (foul), 86. Ibrahimi (malsportadad), 89. Dietschi (retardar il giug). – Schluein Glion senza D’Atria, Matthias Derungs, Kohler (blessai), Cabalzar, Egger, Gallmann (absents).  – 59. + 67. siets en la petga Ruggell (Ospelt, Zeqiri). – Corners: 3:10.