Il resultat da 3:0 para da vegnir pli e pli en moda per l’equipa da Schluein Glion. Era ordvart encunter il club da ballapei da Schaan ha Schluein Glion sittau treis gols e recaltgau negin, sco gia en dus ulteriurs giugs questa primavera.
Sin la plazza da sport Rheinwiese a Schaan cun treis bellezia plazs cun pastg natiral ha il giug encunter l’equipa che ha questa primavera gudignau siat giugs, giugau ina gada pari e piars negins giu liug sin in plaz artificial agl ur digl areal! Bien che l’equipa da Schluein Glion ha trenau en la preparaziun bia giu Cuera sin ils plazs dalla Obere Au ed ei perquei era empau disada da dar bal sin plazs artificials. Gia naven dall’entschatta ei semussau che l’eqiupa da casa vegni ad esser in grev adversari che sa e vul sez era dar bal e buca mo surschar il giug agl adversari. Schaan ha lu era giu l’emprema buna caschun da sittar in gol. Suenter in siet da cantun ei Fabio Quaderer siglius il pli ad ault ed ha sittau la balla cul tgau sin gol. Cun ina buna reacziun ha Flurin Capaul denton menau la balla sur gol ora. Silsuenter ha Schluein Glion priu pli e pli il giug enta maun. Cun spertas attaccas sur las alas han ils giugadurs dau pulit da suar alla defensiun indigena. Ina da quellas attaccas ha diesch minutas avon pausa era menau agl emprem gol per Schluein Glion. Lars Caduff ha insistiu e fatg pressiun sin la defensiun, ha recaltgau la balla e surviu quella a Marino Cavegn che ha buca schau schanza al goli e marcau il 0:1. Otg minutas pli tard eis ei iu exact sin moda cuntraria. Marino Cavegn ei mitschaus dalla vart dretga a siu defensur ed ha stuschau la balla a Lars Caduff che ha sittau il secund gol per Schluein Glion. Cuort avon la fin dalla emprema mesadad han ils da casa giu discletg. In siet da distanza da Mathias Quaderer ei numadamein rebattius dalla petga.
Suenter la pausa ha Schluein Glion controllau il giug e strusch lubiu ina buna acziun offensiva alla equipa da casa. Gia baul ei era il tierz gol per ils hosps curdaus. Rafael Deplazes ha surviu cun in genial pass en la profunditad Serafin Bundi, il qual ha stuschau la balla ponderau sper il goli vi en la reit. Tier quei resultat eis ei stau entochen alla fin, senza che Schluein Glion vegni aunc enzacu en las stretgas da stuer dar giu puncts.
FC Schaan – US Schluein Glion 0:3 (0:2)
Rheinwiese. – 50 aspectaturs/-as. – AR: Dilemen.
Gols: 35. Cavegn 0:1; 43. Caduff 0:2, 54. Bundi 0:3.
Schaan: Miguel Da Graca; Martins (46. De Almeida Pires), Eberle (46. Loos), Fabio Quaderer, Petrovic (67. Mazreku); Kranz, Ubavic (69. Biedermann), Alves Gomes (26. Licci), Mathias Quaderer; Antunovic, Oehri.
Schluein Glion: Capaul; Zala (78. Malin), Gianluca Casutt, Sgier, Coray; Livio Derungs, Michel; Cavegn (72. Gallmann), Deplazes, Bundi (72. Vinzens), Caduff (83. Manetsch).
Remarcas: Cartas mellnas: 6. Antunovic (malsportadad), 16. Alves Gomes (reclamar), 90. + 2. Deplazes (foul). – Schluein Glion senza Büchler, D’Atria, Matthias Derungs, Kohler (blessai), Bearth e Dermont (absents). – 45. siet en la petga Schaan (Mathias Quaderer). – Corners: 5:5.