Schluein Glion: dus gols en la davosa minuta!

Cura che schizun la gruppa da fans che ha accumpignau l’equipa da Schluein Glion cun pauca e megafon haveva gia dau si la speronza ch’ei gartegi aunc da sittar in secund gol e gudignar il giug a Landquart, ei quel tuttina aunc curdaus! E buca mo in, mobein schizun dus; en las davosas secundas ha la balla numnadamein aunc inagada anflau la via en gol.

En la runda d’atun ha Schluein Glion piars dus puncts cun giugar mo 1:1 encunter l’equipa da Landquart trenada da Alessandro Giacomelli che ei staus igl antecessur da Corsin Cavegn, il trenader actual da Schluein Glion. Ed il giug ei staus quasi il medem sco igl atun. Lu haveva Schluein Glion astgau sittar 12 siets da cantun, dumengia vargada schizun 14, senza ch’in sulet procuri per fetg gronda malsegirtad. Ed era quella gada ha Landquart sittau practicamein mo ina gada sin gol e marcau cun quei siet siu sulet gol, e puspei ei quei stau in culp liber! Mo quella gada ha la tactica da Landquart da giugar aschi defensiv sco pusseivel e mirar da recaltgar enzaco in punct per buca curdar sil davos plaz en la tabella, buca purtau success. 

Mo lein entscheiver davon. L’equipa da Schluein Glion ei ida cun in gol en avantatg suenter 16 minutas entras Lars Caduff. El ei vegnius survius da Marino Cavegn ch’ei mitschaus dalla vart dretga da siu defensur ed ha surviu la balla perfetg ad el. En la 31avla minuta ei il 1:1 curdaus, ord il nuot e suenter che la defensiun da Schluein Glion ha schenghegiau in culp liber als da casa. Quel ha Renato Oswald plazzau sur il mir en el cantun bass seniester. Quei resultat ha valiu entochen en la 93avla minuta. En quella ultima minuta ha Schluein Glion aunc inagada empruau da sittar il gol alla victoria, e quella gada eis ei gartegiau. Suenter pliras emprovas da sittar ei la balla curdada a Rafael Deplazes avon ils peis. Siu siet entras plirs giugadurs ha anflau la via el cantun ault seniester. Mo quei ei aunc buca stau la finziun. Igl arbiter ha aunc schau giugar in mument e Lars Caduff ha conquistau la balla dil davos defensur da Landquart ed aschia saviu cuorer persuls encunter gol e marcar siu 29avel gol dalla stagiun. 

FC Landquart – US Schluein Glion 1:3 (1:1)

Ried. – 65 aspectaturs/-as. – AR: Hasler.

Gols: 16. Caduff 0:1; 31. Oswald 1:1, 90. + 3. Deplazes 1:2, 90. + 4. Caduff 1:3.

Landquart: Mayer (22. Minni); Sandro Hertner, Oertli, Martin, Hermle; Pirovino, Candrian, Oswald, Niggli (73. Flavio Hertner);  Fausch, Leblebici (90. Bonguglielmi). 

Schluein Glion: Capaul; Zala, Coray (46. Bearth), Sgier, BĂĽchler (46. Dermont); Michel (75. Coray), Derungs, Deplazes, Cavegn; Bundi (46. Vinzens), Caduff.

Remarcas: Cartas mellnas: 20. Bundi (foul), 30. Coray (foul), 34. Leblebici (foul), 61. Oertli (foul). – Schluein Glion senza D’Atria, Matthias Derungs (reconvalescents), Afzali, Kohler (blessai), Gianluca Casutt (absents). – Corners: 2:14.