Schluein Glion: spiars en las davosas minutas

Strusch da crer che Schluein Glion ha aunc saviu piarder quei giug en las davosas minutas! L’equipa da casa ha dominau il giug naven dalla 15avla minuta claramein ed havess stuiu decider la partida gia baul el decuors dalla secunda mesadad. Mo pliras bunas caschuns da marcar ein buca vegnidas nezegiadas, aschia ch’ils hosps ord il Principadi dil Lichtenstein han cuort avon la fin aunc sittau ils dus gols dalla victoria.

All’entschatta dil giug pareva l’equipa indigena dad esser empau dormulenta. Aschia che Triesenberg ha giu dapli dil giug ed ei ius meritadamein en avantatg. In siet da Matjia Duric ei rebattius dalla petga en l’otgavla minuta exact avon il peis da Reto Tscherfinger che ha sittau la balla da bien endisch meters en la reit. Schluein Glion ei vegnius en la quendischavla minuta l’emprema gada malsegirs avon gol. Lars Caduff ha denton buca saviu surmontar il goli dils hosps, era sch’el steva tuttenina tut persuls avon el. Meglier ha el fatg quei en la 25avla minuta. Alla fin d’ina biala e sperta attacca sur la vart seniastra ha Luzi Dermont – che ha giugau siu davos giug per l’emprema equipa da Schluein Glion, cunquei ch’el ha decidiu da terminar sia cariera – surviu la balla precis sil pei al caposettagols, aschia che lez ha realisau siu trentavel gol en quest campiunadi.

La secunda mesadad ha Schluein Glion dominau claramein. In’attacca suenter l’autra ei vegnida lantschada mo pliras bunas caschuns ein vegnidas munchentadas, aschia ch‘ei ha duvrau in siet da cantun per ir en avantatg. Carlo Bearth ha sittau quel ferm sin la lingia da tschun, nua che Marino Cavegn ei siglius il pli ad ault ed ha menau la balla cul tgau en gol. Era suenter quei gol ha Schluein Glion dominau e tuttina ha la finala Triesenberg gudignau. Cun dus conters en la 87avla ed en la 90avla minuta ha l’equipa dil Principadi surpriu ils da casa ed aschia gudignau il giug entras gols da Raffael Loosli Borislav Pavicic. Aschia ha era Corsin Cavegn ch’ei staus per la davosa gada sco cau-trenader sper la lingia stuiu terminar siu engaschament tier Schluein Glion cun ina terrada. Donn, mo engrazia fetg Corsin per tut quei che tgi has fatg per l’USSI.

US Schluein Glion – FC Triesenberg 2:3 (1:1)

Crap Gries. – 205 aspectaturs/-as. – AR: Mihaljevic.

Gols: 8. Tscherfinger 0:1; 25. Caduff 1:1, 74. Cavegn 2:1, 87. Loosli 2:2, 90. Pavicic 2:3.

Schluein Glion: Casutt; Cavegn, Sgier, Livio Derungs, Dermont; Michel, Bearth; Vinzens (52. Zala), Bundi (82. Coray), Deplazes; Caduff.

Triesenberg: Pupovac; Maia de Sousa, Sljivar, Gasner (78. Banzer), Foser (90. + 1. Duric); Redzepi (78. Meier), Mitrovic (78. Loosli), Mazzini (78. Niklas Beck), Tscherfinger (53. Pavicic); Jonas Beck, Duric (85. Mazzini).

Remarcas: Cartas mellnas: 32. Gasner (foul), 46. Deplazes (foul), 69. Jonas Beck (foul) . – Schluein Glion senza Afzali, Büchler, D’Atria, Deplazes, Matthias Derungs e Kohler (blessai ni reconvalescents). – 8. Siet en la petga Triesenberg (Duric), 33. siet cul tgau en la traversa Schluein Glion (Bundi).  – Corners: 11:4.