All’entschatta dil giug ha ei viu ora sco sche ils giugadurs da Schluein Glion fussan aunc en vacanzas. Landquart ha dominau ed havess saviu ir cun dapli che mo in gol en avantatg. L’entira secunda mesadad e cunzun encuter la fin dil giug ha l’equipa da casa lu practicamein dau sin in gol. Il gol dalla victoria ha denton buca vuliu curdar; memia pauc precis ein ils siets stai, memia engaschai il giugadurs da Landquart che han per tut prezzi vuliu segirar silmeins in punct ed ein semess en mintga cumbat cun tgierp ed olma.
Gia en la quarta minuta ei igl emprem gol curdaus entras Jetmir Hashani che ei vegnius lantschaus cun in pass liung che ha surpriu l’entira dormulenta defensiun indigena. Igl 1:1 ei curdaus en la 14avla minuta. Rafael Deplazes ha retschiert la balla en la zona da puniziun da Tiziano Vinzens ed ha plazzau ella tras pliras combas en la reit. Tgi che ha quintau che Schluein Glion surprendi ussa il domini dil giug ei vegnius trumpaus. Adina han malprecauziuns e malsegirtads dils giugadurs indigens purtau ils hops el giug. Ed aschia han els era getg engrazia en la 32avla minuta ed sittau entras Marc Pirovino il 1:2.
Da pausa ha Patric Casutt en siu emprem giug sco cautrenader midau en Sattar Afzali per dar elan al giug amiez. E quei ha era purtau fretg, Afzali ha dirigiu il giug e dau niev slontsch all’offensiva. L’equipa ha elavurau pliras bunas caschuns d’egualisar, tuttas ein denton vegnidas munchentadas. Era la secunda midada da Casutt ha lu denton purtau fretg. En la 58avla minuta ha el schau ir Leandro Bastos sil plaz che ha mo treis minutas pli tard sittau siu emprem gol per Schluein Glion e quei en siu giug da debut per l’emprema equipa. Per dapli ha ei denton buca tunschiu.
US Schluein Glion – FC Landquart 2:2 (1:2)
Crap Gries. – 206 aspectaturs/-as. – AR: Tahiri.
Gols: 4. Hashani 0:1; 14. Deplazes 1:1, 32. Pirovino 1:2, 61. Bastos 2:2.
Schluein Glion: Alessandro Casutt; Holderegger, Sgier, Gianluca Casutt, Büchler; Michel (46. Afzali), D‘Atria, Laurin Zala, Vinzens (58. Bastos); Deplazes (77. Bundi), Caduff.
Landquart: Minni; Sandro Hertner, Oertli, Hartmann, Sousa (81. Carvajal), Fausch; Flavio Hertner (81. Monteiro), Pirovino, Hashani (71. Gruber), Micevski (77. Costa); Oswald.
Remarcas: Cartas mellnas: 51. Deplazes (foul), 53. Fausch (foul), 62. Hartmann (malsportadad), 66. Hashani (reclamar), 79. Büchler (reclamar), 90. + 4. Oertli (foul), 90. + 4. Afzali (malsportadad) – Schluein Glion senza Bearth, Capaul, Derungs, Kohler (absents). – 35. siet en la petga Schluein Glion (Caduff). – Corners: 10:2.