Schluein Glion: victoria malgrad malsegirtads en la defensiun

Encunter la secunda equipa dil club da ballapei da Domat ha ei giu num per Schluein Glion da recaltgar puncts per buca piarder il cuntact cun ils emprems en la tabella. Igl ei lu la finala era gartegiau all’equipa da gudignar il giug claramein, quei denton pér suenter haver schenghegiau dus gols agl adversari ed esser stada duas gadas en disavantatg!

Il giug ha entschiet per propi pér en la 24avla minuta. Lu ha la defensiun indigena lubiu a Danilo Iozzo cun ina cunterattacca da sittar il 0:1. Mo treis minutas pli tard ha Andri Michel egalisau il giug cun in ferm e plazzau siet suenter in clup liber. Ina minuta pli tard menavan denton puspei ils hops. Enstagl defender detschartamein in pass liung, han ils defensurs reclamau in ordgiug e schau sittar David Bucek il 1:2. Mo era da quei avantatg han ils hosps buca saviu selegrar gitg. Puspei mo ina minuta pli tard ei Lars Caduff mitschaus suenter in pass liung alla defensiun ed ha marcau il 2:2. Suenter quei gol ha Schluein Glion aunc fatg dapli pressiun ed aschia sittau quater minutas pli tard il tierz gol. Suenter ina biala cumbinaziun sur la vart seniastra ha Nico D’Atria surviu la balla perfetg a Lars Zala che ha mo aunc stuiu tuschar ella da gol en. Ed ils indigens han lu era aunc reussiu  ina quarta gada cuort avon la pausa e sittau entras Lars Caduff il 4:2. El ei vegnius lantschaus da Laurin Zala cun in fin e precis pass en la gassa. En l’emprema mesadad ein aschia buca meins che sis gols curdai, tuts en las davosas bien vegn minutas.

Persuenter ei il giug staus in bienton pli ruasseivels suenter pausa. Mo aunc inagada han las aspectaturas ed ils aspectaturs astgau applaudir in gol. En la 76avla minuta ha Lars Caduff deviau la balla cul calcogn en la reit ed aschia astgau sittar siu tierz gol persunal. Puspei ei il pass decisiv vegnius furnius da Laurin Zala. 

US Schluein Glion  – FC Ems 5:2 (4:2)

Crap Gries. – 206 aspectaturs/-as. – AR: Kastrati.

Gols: 24. Danilo Iozzo 0:1; 27. Michel 1:1, 28. Bucek 1:2, 29. Caduff 2:2, 33. Lars Zala 3:2, 38. Caduff 4:2, 76. Caduff 5:2.

Schluein Glion: Mattia Büchler; Laurin Zala, Sgier, Gianluca Casutt (63. Derungs), Büchler; Michel, Bundi (41. Kohler), D‘Atria, Lars Zala (63. Vinzens); Deplazes (80. Lars Zala), Caduff.

Ems 2: Brot; Bucek (66. Arber Bojaxhi), Pfister (78. Bardh Bojaxhi), De Luca (87. Djermanovic), Stolz; Fahling, Cedric Seewer (88. Damian Seewer), Parpan (60. Alessio Iozzo), Ehrler, Alessio Seewer; Danilo Iozzo.

Remarcas: Cartas mellnas: 45. Kohler (foul), 53. Casutt (foul), 63. D‘Atria (foul), 66. Deplazes (foul), 77. Ehrler (reclamar), 90. Danilo Iozzo (foul). – Schluein Glion senza Afzali (blessaus), Capaul (absents).  – Corners: 7:3.