Mo quater gis suenter il giug da campiunadi ein las duas equipas da Schluein Glion e Domat 2 puspei fruntadas ina sin l’autra el quartfinal dil Cup grischun. Ed era mesjamna sera ha ei dau ina pluna gols, mo quella gada ha Domat 2 tuccau meglier la noda e gudignau il giug cun 5:3. Schluein Glion sa aschia buca defender il tetel el Cup grischun.
Schluein Glion ha mussau naven dall’entschatta entochen alla fin ina prestaziun plitost maldisgraziada, cunzun en la defensiva. Malsegirtads, malcapientschas, pass falli e piarder cumbats ein stai alla moda; ei ha pariu sco sche l’equipa fuss buca promta per dar quei giug. Aschia eis ei buca stau da smarvegliar che Domat 2 menava da pausa cun 2:0 suenter in gol entras in penalti da Alessio Seewer ed in culp cul tgau da Gian-Luca Fahling suenter in siet da cantun. Buc olma havess disturbau el da realisar quei gol.
Da pausa ha Patric Casutt reagau e midau l’equipa sin buca meins che sis posiziuns. Quei ha lu era immediat purtau fretg. Gia en la 47avla minuta ei il 1:2 curdaus entras Lars Zala. Mo il secuntener defensiv dall’equipa ei era en la secunda mesadad buca vegnius megliers. Sbagls per part catastrofals han lubiu a Danilo Iozzo da sittar enteifer 13 minutas ina tripletta e decider il giug. Quei han era il gol da Noa Paulin al 2:3 ed il secund gol da Lars Zala al 3:5 buca saviu midar.
Per Schluein Glion ei il viadi el Cup grischun pia a fin. L’equipa sa ussa seconcentrar sin ils giugs da campiunadi ed il giug da Cup svizzer, nua che l’equipa frunta el tierz giug da qualificaziun sin l’equipa dil FC Berg dalla Turgovia.
US Schluein Glion – FC Ems 2 3:5 (0:2)
Crap Gries. – 100 aspectaturs/-as. – AR: Gämperle.
Gols: 22. Alessio Seewer 0:1 (penalti); 44. Fahling 0:2, 46. Lars Zala 1:2, 53. Danilo Iozzo 1:3, 57. Paulin 2:3, 58. Danilo Iozzo 2:4, 70. Danilo Iozzo 2:5, 90. Lars Zala 3:5.
Schluein Glion: Alessandro Cassutt; Holderegger (46. Laurin Zala), Derungs, Gianluca Casutt (46. Sgier), Büchler; Michel (46. Paulin), Bearth (82. Gianluca Casutt), Bastos (46. D’Atria, 48. Bastos, 76. Michel), Vinzens (46. Lars Zala); Deplazes, Caduff (46. Rechenbach).
Ems 2: BĂĽhler; Bucek, Pfister (46. Djermanovic), De Luca, Koneswarasingam; Fahling, Cedric Seewer (89. Bojaxhi), Rashiti (76. Dietrich), Ehrler, Alessio Seewer; Danilo Iozzo (80. Alessio Iozzo).
Remarcas: Cartas mellnas: 22. Derungs (foul), 62. Bearth (foul), 72. Deplazes (foul), 72. Djermanovic (malsportadad), 87. Alessio Seewer (retardar il giug). – Schluein Glion senza Afzali (blessaus). – Corners: 3:3.