Encunter la secunda equipa dil club da ballapei da Mels ha Schluein Glion mussau ina zun mediocra prestaziun e spiars meritadamein 1:3. Suenter in quart ura han dus gols enteifer mo ina minuta purtau l’equipa da casa sin la via dil success. Schluein Glion ha giu l’entira emprema mesadad breigias da crear caschuns per sittar gols ed era suenter il té cun il ferm vent el dies ei l’equipa buca stada habla da volver il giug.
Strusch ch’il giug ha giu entschiet ei la midada dall’aura prognosticada arrivada a Mels. Ei ha entschiet a plover ed in vent furibund ha sufflau sur il plaz vi. L’equipa da casa ha nezegiau d’astgar dar naven dall’entschatta cun il vent el dies e sittau la balla adina beinspert anavon ed aschia procurau per enqual scena miezmalsegira en la zona da puniziun da Schluein Glion. Per ir en avantatg ha Mels denton duvrau il sustegn dil goli dils hosps. En la 14avla minuta eis el buca vegnius da retener in culp liber da Marco Wildhaber naven dalla vart dretga e mo ina minuta pli tard ha el targlinau cun cuorer ord il gol e dau aschia la caschun a Jan Gubser da sittar il 2:0. La reacziun da Schluein Glion sin quels gols ei stada pli che mudesta, l’entira equipa pareva sco paralisada.
Suenter il té ha Schluein Glion – ussa cul vent el dies – surpriu il domini e beinspert ei era il gol al 1:2 curdaus entras Serafin Bundi. El ha reagau spert suenter in siet rebattiu dil goli da Mels e sittau la balla ord in anghel fetg git en la reit. Dapli ei denton buca gartegiau, era sche l’equipa sursilvana ha entochen alla fin empruau d’egalisar e forsa schizun aunc volver il giug. Perseunter ha Mels tard el temps supplementar aunc sittau cun ina cunterattacca entras Arno Ackermann il tierz gol ed aschia decidiu definitivamein il giug.
FC Mels 2 – US Schluein Glion 3:1 (2:0)
Tiergarten, Mels. – 120 aspectaturs ed aspectaturs. – AR: Vrenezi.
Gols: 14. Wildhaber 1:0, 15. Gubser 2:0, 52. Bundi 2:1, 90.+ 3. Ackermann 3:1.
FC Mels 2: Rissi; Jerome Lymann (72. Bigger), Zogg, Herrmann, BĂĽchel; Philippe Lymann (64. Eberle), Kalberer, Tschirky, Wildhaber; Ackermann (90.+ 4. Schlegel), Gubser (75. Moser).
US Schluein Glion: Alessandro Casutt; Laurin Zala (46. Pool), Gianluca Casutt, Sgier, Holderegger; Lars Zala, Derungs, Bearth (76. Michel), Michel (46. Paulin); Bundi (81. Laurin Zala), Caduff.
Remarcas: Cartas mellnas: 38. Zogg (retardar il giug), 51. Philippe Lymann (foul), 53. Wildhaber (reclamar), 61. Paulin (foul), 62. Lars Zala (reclamar), 80. Rissi (retardar il giug), 82. Ackermann (reclamar), 83. Pool (foul). – Schluein Glion senza Afzali, D’Atria, Kohler (blessai), Deplazes (serraus), Mattia BĂĽchler, Capaul (absents). – Corners: 6:8.