Schluein Glion spiarda danovamein

Suenter la terrada encunter Mels 2 eis ei era buca gartegiau a Schluein Glion da gudignar encunter la secunda equipa da Cuera 97. All’entschatta ha ei aunc vesiu ora bein ed igl ei era gartegiau dad ir 1:0 en avantatg. Mo quater minutas pli tard ei il 1:1 denton curdaus ed in gol cuort avon e dus cuort suenter pausa – tuts treis entras Davide Rosafio – han viult il giug e purtau la victoria als hosps. Schluein Glion ha piars la buna fuorma dall’entschatta dil campiunadi e pliras absenzas da giugadurs da tschep han buca saviu vegnir cumpensadas.

En la quarta, 12avla e 14avla minuta ha Schluein Glion giu treis grondas occasiuns per ir en avantatg, duas gadas entras Carlo Bearth ed ina gada entras Tiziano Vinzens. Tuttas treis occasiuns ein vegnidas munchentadas e tuttina eis ei gartegiau al equipa da casa da sittar igl emprem gol suenter ina buna mesa ura. Livio Derungs, en sia emprema acziun suenter ch’el era gest vegnius midaus en, ha alzau la balla en la zona da puniziun, nua che Lars Zala hasurpriu ella e sittau en la reit. Quei gol ha denton buca purtau gronda segirtad all’equipa indigena. Quater minutas pli tard ha la defensiun targlinau cun far pressiun sin ils attaccaders da Cuera e lubiu a John Rodrigues da preparar e sittar la balla naven da strusch vegn meters el cantun bass dretg. Per Cuera 97 eis ei vegniu cuort avon la pausa aunc meglier. El temps supplementar suenter ch’ils reflecturs havevan per in mument calau da far cazzola eis ei gartegiau ad els da sittar il secund gol entras Davide Rosafio.

Tgi che ha spetgau ina reacziun da Schluein Glion suenter il te ei vegnius trumpaus. Anzi, suenter in quart ura ha Cuera 97 decidiu il giug cun dus gols enteifer treis minutas. Omisduas gadas ha la defensiun dall’equipa da casa buca fatg ina buna impressiun ed omisduas gadas ha Davide Rosafio profitau cun saung freid. En la davosa mesa ura eis ei buca gartegiau all’equipa da casa da crear bunas occasiuns per sittar gols ed igl ei era buca gartegiau da far gronda pressiun e smaccar ils hosps en lur zona da defensiun.

US Schluein Glion  – Chur 97 2 1:4 (1:2)

Crap Gries. – 155 aspectaturs/-as. – AR: Bilge.

Gols: 34. Lars Zala 1:0; 38. John Rodrigues 1:1, 45.+ 3. Rosafio 1:2, 59. Rosafio 1:3, 62. Rosafio 1:4.

Schluein Glion: Capaul; Holderegger (71. Ascenso), Gianluca Casutt, Sgier, Büchler; Michel (71. Studer), Paulin, Bundi, Bearth; Vinzens (33. Derungs), Lars Zala.

Chur 97 2: Mordasini; Cherry, Martins, Mogus, Collenberg (81. Bogdanovic); Monojlovic (51. Gasem), Burn, Francisco Rodrigues, Walser; John Rodrigues, Rosafio (77. Ranieri).

Remarcas: Cartas mellnas: 33. Rosafio (reclamar), 48. Bundi (foul), 79. Francisco Rodrigues (sittar naven la balla), 90. + 3. Burn (retardar il giug). – Schluein Glion senza Afzali, D’Atria, Kohler (blessai), Deplazes, Laurin Zala (serrai), Caduff, Coray (absents).  – Corners: 2:5.