A Schluein Glion gartegia ei da gudignar il davos giug dalla runda d’atun encunter Bogn Ragaz ed aschia francar il secund plaz en la tabella. Suenter ina entschatta plitost nervusa ha Schluein Glion surpriu pli e pli il domini dil giug e decidiu tal suenter la pausa. Igl emprem sgol ei curdaus gest suenter ch’in giugadur da Bogn Ragaz ha stuiu bandunar il plaz.
Il davos giug dalla runda d’atun ha entschiet da plitost malemperneivlas cundiziuns d‘aura cun avantatgs per l’equipa da casa. Ils giugadurs da Schluein Glion parevan empau malsegirs, cunzun en la defensiun, ed han duvrau in bien mument per vegnir el giug. Aschia ha Bogn Ragaz era giu l’emprema caschun d’ir en avantatg entras in culp cul tgau da Nando Thöny. El ha denton sittau la balla sur la traversa ora; e quei ei lu era gest stau la megliera caschun per ils indigens d’arver il score. Naven dalla 20avla minuta ha numnadamein mo pli Schluein Glion giu bunas caschuns da sittar gols, a Bogn Ragaz eis ei malgrad che l’equipa ei stada dapli en posess dalla balla buca gartegiau da crear enzatgei malsegiar en la zona da puniziun dils hosps. Cunquei ch’igl ei denton buca reussiu als attaccaders da Schluein Glion da realisar in gol, era sch’els ein stai buca meins che quater gadas tut persuls avon il goli da Bogn Ragaz, ein las duas equipas idas cul resultat da 0:0 en la pausa.
Suenter il té ha Schluein Glion lu dominau il giug pli e pli clar, cunzun naven da la 57avla minuta, cura che Corvin Kühne ei vegnius spedius digl arbiter giu dil plaz. El era vegnius admonius en l’emprema mesadad muort reclamar ed ha selubiu da segar in giugadur da Schluein Glion cun tutta vehemenza giu dallas combas senza haver ina schanza da puder tier la balla. Agl arbiter ei restau nuot auter che da mussar la carta mellen-cotschna ad el. Il culp liber ord quei foul ha menau agl emprem gol da Schluein Glion. La flanca liunga ha anflau il tgau da Gian Sgier e da leu la via en la reit. Bien diesch minutas pli tard ei il secund gol curdaus. Lars Caduff ha en sia emprema acziun suenter ch’el ei entraus sil plaz recaltgau la balla d’in defensur da Bogn Ragaz e stuschau ella a Rafael Deplazes che steva tut persuls avon gol. E quella gada ha lez era buca schau rugar e marcau suveran il 0:2. Las ulteriuras bunas caschuns da marcar han ils giugadurs da Schluein Glion munchentau tuttas.
Cun quella victoria en il davos giug d’atun ha Schluein Glion francau siu secund plaz en la tabella. Ussa suonda sonda proxima aunc il giug da Cup svizzer encunter il club da ballapei da Rüti a Glaruna e suenter ha l’equipa meritau da guder la pausa d’unviern.
FC Bogn Ragaz – US Schluein Glion 0:2 (0:0)
Ri-Au, Bogn Ragaz. – 165 aspectaturs ed aspectaturs. – AR: Erden.
Gols: 58. Sgier 0:1, 71. Deplazes 0:2.
FC Bogn Ragaz: Pagonas; Kressig, Kohler, Roffler, Kühne; da Costa (73. Schneeberger), Caluori (60. Rauti), Radosevic, Sprecher (82. Horni); Bless (19. Murano), 9. Thöny.
US Schluein Glion: Mattia Büchler; Holderegger, Casutt, Sgier, Pool; Laurin Zala (70. Caduff), Bearth (54. Derungs), Paulin, Vinzens (29. Rechenbach); Deplazes (90. Capeder), Lars Zala (87. Manetsch).
Remarcas: Cartas mellnas: 24. Sprecher (foul), 39. Kühne (reclamar), 43. Kressig (foul), 53. Kühne (foul). – Carta mellen/cotschna: 57. Kühne (foul). – Schluein Glion senza Afzali, D’Atria, Kohler (blessai), Aron Büchler (serraus). – 68. siet en la traversa Schluein Glion (Paulin). – Corners: 2:8.