Suenter la clara victoria per l’entschatta dalla secunda runda dil campiunadi da tiarza ligia perschuada l’equipa da Schluein Glion era encunter Mels 2. Mintgamai dus gols per mesadad han purtau ina victoria meritada ch’ei en negin mument stada periclitada. Perschuadiu ha cunzun era la prestaziun defensiva, strusch ina caschun da marcar han ils hosps saviu elavurar, aschia che il goli Flurin Capaul ha passentau in ruasseivel suentermiezgi a Crap Gries e quei da gronda calira ed avon ina biala roscha d’aspectaturas ed aspectaturs.
Igl atun vargau ha Schluein Glion giu spiars encunter las reservas da Mels in gi da plievgia e ferdaglia giu a Mels. Per quella terrada ha l’equipa priu dumengia vargada da bellezia aura e gronda calira claramein revanscha a Crap Gries. Gest quater gols han ils attaccaders sittau e mussau ch’els ein bein en fuorma. Mo era la defensiun stat questa primavera pli segir ch’igl atun, en treis giugs (2x campiunadi, 1x cup svizzer) ha ella buca lubiu als adversaris da sittar gols, gie strusch lubiu ad els ina suletta caschun da marcar in gol.
Ils emprems dus gols dalla dumengia vargada ein curdai enteifer quater minutas suenter bien vegn minutas da giug. Per sittar il 1:0 ei Lars Caduff vegnius survius grondius da Lars Zala cun in pass anavos naven dalla lingia dil gol. Il 2:0 ha Ruben Rechenbach sittau naven da strusch vegn meters cun in siet plazzau el cantun bass, suenter ch’el ha giu gudignau in cumbat per ina balla rebattida suenter in culp liber. Ils dus gols suenter pausa ein curdai suenter bialas cumbinaziuns dils attaccaders indigens. Omisduas gadas ei Rafael Deplazes vegnius survius ideal da ses partenaris – per il 3:0 da Lars Caduff e per il 4:0 da Lars Zala.
US Schluein Glion – FC Mels 2 4:0 (2:0)
Crap Gries, Schluein. – 275 aspectaturs ed aspectaturs. – AR: Tomasi.
Gols: 21. Caduff 1:0, 25. Rechenbach 2:0, 54. Deplazes 3:0, 77. Deplazes 4:0.
US Schluein Glion: Capaul; Laurin Zala, Casutt, Sgier, Holderegger (52. Pool); Paulin (75. Malin), D’Atria (66. Vinzens), Rechenbach (62. Manetsch), Lars Zala (82. Rechenbach), Caduff, Deplazes.
FC Mels 2: Rissi; Herrmann (64. Schlegel), Lampert (86. Tschirky), Fabio Kalberer, Bigger (46. Ben Ackermann); Lymann (81. Weber), Arno Ackermann, Tschirky (72. Schäpper), Silvan Kalberer; Eberle, Maggion (64. Mitrovic).
Remarcas: Cartas mellnas: 23. Rissi (foul), 70. Sgier (foul). – Schluein Glion senza Afzali, Aron e Mattia Büchler, Bundi (blessai), Derungs (serraus), Bearth, Coray (absents). – 62. siet en la petga Schluein Glion (Deplazes), 81. siet sin la traversa Schluein Glion (Caduff)– Corners: 8:3.