Mesjamna sera ha l’equipa da Schluein Glion gudignau treis ulteriurs puncts ed aschia francau il secund plaz en la tabella dalla gruppa 1 dalla tiarza ligia. Mo ei ha duvrau tut; gie igl adversari si dil Principadi dil Lichtenstein ha teniu bein petg ed havess segir buca engulau in punct sch’ei fuss gartegiau ad el d’egalisar cun sias davosas attaccas furibundas.
Il giug denter Schluein Glion e Triesen che ha stuiu vegnir refiers avon duas jamnas muort la neiv ei vegnius daus mesjamna sera. Neiv haveva ei buca pli sil plaz, persuenter strihava in vent criu e freid atras il stadion a Crap Gries e mudergiava ton aspectaturas ed aspectaturs sco era ils giugadurs sil plaz. Meglier a frida cun las relaziuns ein ils hosps vegni all’entschatta ed els ein aschia i gia suenter otg minutas en avantatg. Pliras decisiuns munglusas da plirs giugadurs da Schluein Glion ha schau vegnir Raphael Auer tut persuls vid la balla sin strusch diesch meters, aschia ch’el ha buca giu breigia da marcar il 0:1. Schluein Glion ha denton reagau immediat sin quella frida. Mo ina minuta pli tard ei Rafael Deplazes vegnius mess a tiara cuort avon la lingia da sedisch. Lars Caduff ha tschentau la balla e plazzau ella cun in siet precis sur il mir ora el cantun seniester al 1:1. Silsuenter ei sesplegau in giug uliv, fetg cumbattiu cun in lev plus offensiv per ils hosps. La megliera caschun per Schluein Glion d’alzar il score ha Livio Derungs giu. Siu siet da distanza ei denton rebattius dalla petga en la 39avla minuta.
La secunda mesadad ha entschiet cun ina gronda caschun da marcar per Triesen. Manuel Lèfebvre ei vegnius lantschaus en la profunditad ha cuglianau il goli e vuliu sittar la balla ord in anghel git en la reit. Mo Tiziano Vinzens ha pudiu bloccar la balla sin la lingia ed aschia salvar il remis. En la 57avla minuta han ils attaccaders indigens lu fatg gronda pressiun sin la defensiun dils hosps. Lars Caduff ha attaccau il goli, Lars Zala il defensur che ha survegniu la balla ed aschia pudiu gudignar ella e survir Rafael Deplazes che ha marcau luc il 2:1. Tier quei resultat eis ei restau entochen alla fin, era sche ton Schluein Glion sco era Triesen han aunc giu enqual caschun da marcar. Ed era sche Triesen ha fatg en las davosas minutas fetg gronda pressiun e sfurzau ils indigens ferm en la defensiun. In bien goli e bien spért da cumbat han denton schau purtar a casa Schluein Glion ils treis puncts.
US Schluein Glion – FC Triesen 2:1 (1:1)
Crap Gries, Schluein. – 155 aspectaturs ed aspectaturs. – AR: De Pace.
Gols: 8. Auer 0:1, 10. Caduff 1:1, 57. Deplazes 2:1.
US Schluein Glion: Capaul; Holderegger, Casutt, Sgier, Vinzens (68. Coray); Derungs, D’Atria (81. Bundi), Bastos (61. Rechenbach), Lars Zala (90. Manetsch), Caduff, Deplazes.
FC Triesen: Kindle; Salzgeber, Bicker, Dany Perreira, Patrick Bargetze (70. Fabian Bargetze); Kevin Perreira, Lefèbvre, Auer; Fejzaj, Preite, Miler.
Remarcas: Cartas mellnas: 34. Rothmund (reclamar, trenader Triesen), 56. Casutt (foul), 66. Sgier (reclamar), 80. Dany Perreira (foul). – Schluein Glion senza Afzali, Aron e Mattia Büchler, Paulin, Laurin Zala (blessai), Pool (malsauns), Bearth (absents). – 39. siet en la petga Schluein Glion (Derungs). – Corners: 2:9.