En in giug spert ed interessant denter duas equipas dalla emprema mesadad dalla tabella ha Schluein Glion fatg la sonda vargada sempel agl adversari da Cuera 97 2 da sittar gols ed aschia spiars il giug cun 2:4 gols. Aschia ha l’equipa sursilvana stuiu prender encunter ina frida freida el cumbat per il secund plaz en la tabella.
Strusch che il giug ha giu entschiet ei l’equipa da Cuera 97 2 gia ida en avantatg cun 1:0. Igl arbiter ha schulau en la tiarza minuta in foul per ils indigens bi amiez il plaz, il qual ei vegnius sittaus spert e liung sur la defensiun aunc empau dormulenta da Schluein Glion ora a Jesse Neuhaus che ha saviu cuorer persuls encunter gol e marcar. Quei gol ha lu era mussau claramein il muster cun il qual l’equipa dalla capitala vuleva vegnir al success. Ballas liungas dil goli ni dils defensurs ein stadas duront igl entir giug la devisa da Cuera 2 e la defensiun da Schluein Glion ha era duront igl entir giug giu grondas breigias cun quellas ballas! Sin igl emprem cuntergol ha l’equipa denton reagau vehement e fatg gronda pressiun, aschia ch’il gol dalla egalisaziun ei curdas gia en l’otgavla minuta entras Tiziano Vinzens che ha astgau terminar ina biala acziun sur pliras staziuns. Silsuenter ha Schluein Glion fatg il giug, mo munchentau duas bunas caschuns suenter culp libers. Ils indigens han sco gia menziunau giugau cun ballas liungas. Ina da quellas ballas ha purtau il 2:1 en la 29avla minuta. Quella gada ha il goli astgau nudar igl assist ed Alessando Mogus ei staus il realisader. Ed igl ei aunc vegniu meglier per Cuera 97 2. Puspei in pass liung ord la defensiun sin l’ala seniastra pareva gia d’esser vegnius neutralisaus, mo tuttina ei la balla aunc vegnida sittada ferm e miez ault avon il gol, nua che Antonio Ranieri ha menau ella da gol en.
Suenter la pausa ei l’equipa da Cuera 97 2 seretratga pli fetg en la defensiun e surschau il far il giug als hosps. Lez han fatg tut il pusseivel da reducir il disavantatg, mo avon il gol leva nuot propi gartegiar. Surprendentamein ei lu schizun il 4:1 per ils indigens curdaus. Suenter ina dallas raras cunterattacas han ei astgau sittar in corner. Suenter che la balla ei buca vegnida liberada ord in smugl eis ella curdada a Davide Rosafio avon ils peis, il qual ha buca schau rugar e sittau ella en la reit. Puspei ha Schluein Glion reagau vehement e sittau mo duas minutas pli tard siu secund gol. Era suenter in corner ed era ord in smugl ha Gian Sgier dumignau la balla sur lingia en. Tut ils sforzs da sminuir aunc pli fetg il disavantatg han buca purtau fretg a Schluein Glion, aschia ch’il giug ei ius a piarder. Ussa spetga dumengia proximna il final dil Cup svizzer sin l’equipa da Schluein Glion, nua che cunzun la lavur defensiva sto vegnir liquidada pli detschartamein, sche l’equipa vul gudignar il buccal.
Cuera 97 2 – US Schluein Glion 4:2 (3:1)
Obere Au, Cuera. – 95 aspectaturs ed aspectaturs. – AR: Steiner.
Gols: 3. Neuhaus 1:0, 8. Vinzens 1:1, 29. Mogus 2:1, 37. Ranieri 3:1, 67. Rosafio 4:1, 79. Sgier 4:2.
Cuera 97 2: Silva; Machado, Flores Martins, Collenberg; Mogus (90. Dos Santos), Grazia (94. Gashi), Rodrigues, Manojlovic, Neuhaus; Ranieri (83. Kidane), Rosafio (80. Almeida).
US Schluein Glion: Capaul; Gianluca Casutt, Holderegger, Sgier, Pool; Paulin, Derungs (80. Coray), Vinzens (66. Manetsch), Lars Zala (41. Rechenbach); Caduff, Deplazes.
Remarcas: Cartas mellnas: 25. Rodrigues (foul), 48. Vinzens (foul), 60. Ranieri (foul). – Schluein Glion senza Afzali, Aron e Mattia Büchler, D’Atria, Laurin Zala (blessai), Bearth, Bundi (absents). – 73. siet en la traversa Schluein Glion (Rechenbach). – Corners: 2:5.