Ei ha buca duiu esser! Igl ei buca gartegiau all’equipa da Schluein Glion da gudignar il final dil Cup svizzer dallas 3. – 5. ligias, il qual ha giu liug la dumengia vargada a Wittenbach. Encunter l’equipa dil FC Besa da S.Gagl ha ei dau ina terrada da 1:4. Dus gols sin culps libers en igl emprem quart ura suenter la pausa han purtau la decisiun per l’equipa che ha nezegiau sias caschuns ed ha giugau igl entir giug pli clever e decisiv.
Per l’emprema gada en la historia dall’Uniun Sportiva Schluein Glion ei l’emprema equipa sequalificada per il final dil Cup svizzer dallas 3. – 5. ligias e l’equipa ei ida cun grondas speronzas a Wittenbach per dar quei giug. Ina victoria havess muntau la qualificaziun per l’emprema runda principala dil Cup svizzer, nua ch’era in adversari da pli aultas ligias savess esser il proxim adversari. L’equipa da Besa, che dat en la gruppa 2 dalla tiarza ligia dalla Svizra orientala, ei vegnida empau meglier el giug che Schluein Glion, en las empremas bien 20 minutas ei denton buca curiu bia en las zonas offensivas. Ina biala attacca sur l’ala dretga ha suenter 27 minutas tuttina purtau igl avantatg per Besa. Luiz Infante ei mitschaus dalla defensiun ed ha surviu la balla cun in pass travers a Kendry Tejada che ha stuschau ella ord cuorta distanza sur lingia en. Cuort mument pli tard ha Schluein Glion giu sia gronda caschun d’egalisar. Ruben Rechenbach ha sittau naven da rodund 20 meters en direcziun dil gol, siu siet ei vegnius bloccaus mo el ha saviu sittar ina secunda gada e quella gada ha il goli deviau la balla dalla vart ora. Rafael Deplazes ha pudiu tier quella balla cuort avon la lingia ed ha sittau ella sin gol ord quei anghel git. Enstagl d’ir da gol en ei la balla ruclada en la petga e lu dalla lingia vi avon ch’in defensur ha saviu sittar naven ella.
En igl emprem quart ura suenter la pausa ei la decisiun en favur da l’equipa da Besa curdada suenter dus culps libers. Duas gadas ei il secuntener defensiv da Schluein Glion buca staus gest ideals. Besa ha profitau da quei e silsuenter buca dau il giug pli ord da maun. Era perquei che l’equipa ha cuort suenter che Leandro Bastos haveva sittau igl 1:3, marcau entras Arbnor Morina siu quart gol. Che Schluein Glion ha en quei giug buca gest giu il cletg sin sia vart ha era la davosa acziun mussau. Suenter in foul da maun ha Lars Caduff astgau sittar in penalti per migliurar empau il resultat. Mo siu siet ei buca setschentaus en la reit mobein puspei en la petga. La decisiun era denton curdada gia avon quella scena finala.
US Schluein Glion – FC Besa 1:4 (0:1)
Grüntal, Wittenbach. – 250 aspectaturs ed aspectaturs. – AR: Passeri.
Gols: 27. Tejada 0:1, 55. Latifi 0:2, 60. Infante 0:3, 72. Bastos 1:3, 76. Morina 1:4.
US Schluein Glion: Capaul; Laurin Zala (74. Manetsch), Holderegger (41. Coray), Sgier, Pool; Derungs, Paulin (46. Lars Zala), Rechenbach, Vinzens (58. Bastos), Caduff, Deplazes.
FC Besa: Lazraj (94. Polat); Infante (71. Soares), Adzijai, Latifi, Sevkin; Tuncbel, Sadiku, Lekaj (84. Buja), Pellegata (78. Grbic); Tejada (66. Ljatifi), Morina.
Remarcas: Cartas mellnas: 36. Sgier (foul), 84. Soares (foul), 90. + 4. Grbic (foul). – Schluein Glion senza Afzali, Aron e Mattia Büchler, D‘Atria (blessai), Bundi (serraus), Bearth, Gianluca Casutt (absents). – 30. siet en la petga Schluein Glion (Deplazes). – 90. + 3. Schluein Glion (Caduff) setta in penalti en la petga. – Corners: 5:5.