En in giug da pauca qualitad gudogna Schluein Glion mesjamna sera cun 3:2 gols encunter Domat 2. Il giug ha duront las entiras 90 minutas strusch giu niveau da tiarza ligia ed il pign diember d’aspectaturas ed aspectaturs ha per cletg aunc viu el davos quart ura treis gols ed ei aschia silmeins vegnius remuneraus per la pial dira da mirar la partida entochen alla fin.
Domat 2, l’equipa ch’ei sil secund davos plaz en la tabella ed ei consequentamein ferm periclitada da vegnir relegada en la quarta ligia, ha naven dall’entschatta dau gronda peisa alla defensiva. Cun bunamein tut ils giugadurs eis ella seplazzada entuorn lur atgna zona da puniziun ed ha mirau da buca survegnir gols. Schluein Glion ha fatg il giug, ha elavurau enqual caschun da marcar mo munchentau tut quellas entochen la 26avla minuta. En quella minuta ha Leandro Bastos sittau ina flanca naven dall’ala seniastra direct sil tgau a Serafin Bundi che ha marcau il 0:1. Enstagl d’encurir consequentamein il proxim gol ha Schluein Glion priu ei empau pli patgific e lubiu als indigens da serevegnir empau. E cun lur emprema acziun offensiva eis ei schizun gartegiau ad els d’egalisar. Cédric Seewer ha stuschau la balla en la reit, suenter ch’el ei vegnius survius da siu frar Damian Seewer.
Suenter pausa ei il giug vegnius pli lungurus e pér el davos quart ura ha ei aunc dau empau moviment sil plaz. En la 76avla minuta ha Remy Manetsch marcau sin flanca da Lars Caduff cul tgau ord cuorta distanza il 1:2. En la 81avla minuta ha Ruben Rechenbach profitau d’ina malcapientscha en la defensiva da Domat 2 e sittau il tierz gol per Schluein Glion. E mo ina minuta pli tard ha Sandro Dietrich medemamein profitau d’ina malcapientscha en la defensiva dils hosps e sittau il secund gol per ils indigens. Tier quei resultat eis ei lu restau entochen la fin.
FC Domat 2 – US Schluein Glion 2:3 (1:1)
Vial, Domat. – 60 aspectaturs/-as. – AR: Mohm.
Gols: 26. Bundi 0:1; 39. CĂ©dric Seewer 1:1, 76. Manetsch 1:2, 81. Rechenbach 1:3, 82. Dietrich 2:3.
Domat 2: Brot; Parpan, Durmisi, CĂ©dric Seewer, Da Silva; Iozzo, Zimmermann, Reinprecht (79. Almagbaly), Alessio Seewer, Spiller; Dietrich.
Schluein Glion: Capaul; Laurin Zala, Sgier (46. Derungs), Gianluca Casutt, Gartmann; Paulin, Bundi (79. Bastos), Rechenbach (61. Manetsch), Bastos (61. Vinzens); Lars Zala (76. Rechenbach) , Caduff.
Remarcas: Cartas mellnas: – -. – Schluein Glion senza Afzali, BĂĽchler Aron + Mattia, D’Atria, Coray, Holderegger, Pool (blessai); Bearth, Deplazes (absents). – Corners: 1:8.