Cun 3:0 gudogna Schluein Glion igl emprem giug a casa da quest campiunadi encunter il club da ballapei da Sargans e sa aschia far emblidar empau la terrada dall’emprema runda. Il giug ei denton staus per gronda part fetg ulivs e cunzun l’efficienzia avon gol ha lubiu all’equipa da Schluein Glion dad ir sco victura giu dil plaz.
Suenter ina cuorta fasa da pressiun dalla squadra da casa han numnadamein ils hosps giu las empremas bunas caschuns da marcar in gol. Ils attaccaders da Sargans han denton disgiu cumplettamein avon il gol, aschia ch’igl ei reussiu all’equipa da Schluein Glion d’ir suenter ina mes’ura cun ina da sias empremas bunas acziuns offensivas en avantatg. Igl emprem gol dalla sesiun a Crap Gries ha il rutinier Tiziano Vinzens sittau cun in siet plazzau e ponderau el cantun bass seniester, suenter ch’el ei vegnius survius agl ur dalla zona da puniziun da Rafael Deplazes.
Suenter la pausa ha perencunter Schluein Glion giu l’emprema caschun da marcar. Il goli da Sargans ha denton menau in siet da Lars Caduff suenter ina biala acziun persunala cun bravura en corner. Otg minutas pli tard ha era il goli buca saviu evitar il 2:0. Suenter in siet da cantun ha la defensiun buca saviu liberar la balla, la quala ei la finala curdada ad Aron Büchler avon ils peis. Ord cuorta distanza ha el sittau tala cun tutta forza en la reit. Quei gol ha dau segirtad a Schluein Glion che ha naven da quei mument controllau il giug e strusch lubiu als hosps pli bunas acziuns offensivas. Cuort avon la fin ha era Lars Caduff mussau ch’el sa aunc adina nua ch’ils gols ein plazzai a Crap Gries. El ha fatg pressiun sin ils defensurs da Sargans, ha recaltgau la balla, ei curius en direcziun dil gol cun cuglienar il davos defensur e marcar cun segirtad il 3:0.
US Schluein Glion – FC Sargans 3:0 (1:0)
Crap Gries. – 225 aspectaturs. – AR: Tahiri
Gols: 32. Vinzens 1:0, 58. Aron Büchler 2:0, 86. Caduff 3:0.
Schluein Glion: Mattia Büchler; Derungs (90. Gianluca Casutt), Bundi, Aron Büchler; Sgier, Vinzens (68. D‘Atria), Laurin Zala (53. Manetsch), Pool; Deplazes, Lars Zala (79. Bastos Rodrigues), Caduff.
Sargans: Hermann; Mathis (83. Schai), Becker, Tanner; Sivalingam, Willi, Zollino, Bigger, Roner (78. Ackermann); Robin Wachter (68. Corsin Wachter), Santa.
Remarcas: Cartas mellnas: 28. Sivalingam (foul), 51. Mathis (foul), 61. Lars Zala (foul), 77. Derungs (foul), 78. Willi (foul). – Schluein Glion senza Afzali, Bearth, Ronny Casutt, Coray, Paulin (blessai/reconvalescents). – Corners: 6:3.