Totala inefficienzia avon il gol ha custau a Schluein Glion dumengia vargada da gudignar il giug encunter il club da ballapei da Triesen claramein. Alla fin ha l’equipa stuiu esser leda da gudignar silmeins aunc in punct cun tuttina aunc rabitschar la balla ina gada sur lingia en e quei suenter che las 90 minutas eran gia vargadas.
Aspectaturas ed aspectaturs han strusch saviu capir quei ch’ei han viu la dumengia a Crap Gries! L’equipa da casa ha dominau il giug naven dall’entschatta – l’emprema schanza da far in gol ha ella gia giu suenter 22 secundas – gudignau il giug ha ella buc. En tut ha il scribent nudau buca meins che tredisch claras schanzas per marcar in gol per ils indigens sin siu bloc da notizias, en gol ei la balla denton setschentada mo inagada. E quei cun la pli davosa caschun entras il debutant Ronny Casutt che ha suenter ina cuorsa da slalom da Rafael Deplazes entuorn plirs giugadurs stuschau la balla ord cuorta distanza al resultat final e purtau aschia silmeins aunc in punct a Schluein Glion.
Mo lein entscheiver davon. Schluein Glion ha sco menziunau dominau, mo ils hosps da Triesen ein i en la 14avla minuta en avantatg. Mohammed Ouanes ha recaltgau la balla amiez il plaz, ha viu ch’il goli da Schluein Glion era postaus empau anavon ed ha alzau la balla sur el en en la reit. Naven da quei mument han ils da casa attaccau cun vehemenza ed han giu en la 18-,21-,25- e 39avla minuta excellentas caschuns da marcar. Tuttas ein vegnidas munchentadas. Triesen ha cun cunterattaccas adina puspei empruau d’alzar il resultat, quei ei denton era buca gartegiau. La pli gronda caschun da marcar ha l’equipa dil Principadi giu el temps supplementar dall’emprema mesadad. Suenter in foul da Serafin Bundi sco davos um, eis el vegnius spedius giu dil plaz e Mohammed Ouanes ha astgau sittar in penalti. Quel ha Flurin Capaul denton teniu cun bravura.
Suenter pausa ha Schluein Glion dominau vinavon il giug, notabene cun in um pli pauc sil plaz! En la 46-, 60-, 63-, 66-, 67-, 69- ed 84avla minuta ein las proximas claras schanzas suandadas, en gol ei la balla mai setschentada. Suenter pausa ha lu era aunc igl arbiter vuliu surprender ina rolla pli principala en quei giug. En la 73avla minuta ha el taxau in ualti hanau foul vi da Laurin Zala sco „hirundella“ da tal e buca dau al defensur mobein agl attaccader la secunda carta melna e tarmess el aschia giu dil plaz. Quei ha igl arbiter lu cumpensau siat minutas pli tard cun tarmetter in giugadur da Triesen directamein cun la carta cotschna en cabina, era sche quel ha en vuler recaltgar la balla strusch commes in foul! Aschia ei il giug ius a fin cun nov encunter diesch umens e cun la pli davosa scena ch’ei descreta all’entschatta da quest rapport, il gol agl 1:1.
US Schluein Glion – FC Triesen 1:1 (0:1)
Crap Gries. – 175 aspectaturs. – AR: Marinucci
Gols: 14. Ouanes 0:1, 90. + 3. Ronny Casutt 1:1.
Schluein Glion: Capaul; Derungs (46. D’Atria), Bundi, Pool (87. Aron Büchler); Walter, Sgier, Vinzens (46. Ronny Casutt), Laurin Zala; Deplazes, Caduff, Bastos Rodrigues (64. Manetsch).
Triesen: Bicer; Salzgeber, Grünenfelder, Auer, Zogg; Kryezi, Ouanes, Neusüss (19. Preite, 82. Fejzaj); Miller, Hasler (90. Bargetze), Lefèbvre (75. Miracchi).
Remarcas: Cartas mellnas: 30. Vinzens (reclamar), 34. Kryezi (foul), 35. Bundi (foul), 59. Laurin Zala (foul), 71. D’Atria (foul), 74. Mirco Zala (reclamar), 77. Salzgeber (reclamar), 89. Manetsch (foul). – Cartas melnas/cotschnas: 45. + 4. Bundi (foul), 74. Laurin Zala (hirundella). – Carta cotschna: 80. Ouanes (foul). – 66. siet en la petga Schluein Glion (Manetsch). – 45. + 6. Capaul tegn in penalti da Ouanes. – Schluein Glion senza Afzali, Bearth, Coray, Paulin, Lars Zala (blessai/reconvalescents), Mattia Büchler, Carigiet, Gianluca Casutt, Holderegger, Rechenbach (absents) – Corners: 8:4.