Dumengia vargada ha Schluein Glion spiars il giug encunter il club da ballapei da Landquart cun 0:2 gols. L’equipa da Landquart ha sittau exact treis gadas sin gol e fatg dus gols e quei lu, cu ella deva muort ina carta melna cotschna encunter in da ses giugadurs mo pli en diesch. L’equipa da Schluein Glion ha sittau ver vegn gadas sin gol, en gol ei denton negin siet setschentaus.
Ei ha duvrau in mument avon che l’equipa da Schluein Glion ei vegnida da surprender il domini digl giug encunter ina equipa da casa fetg agressiva che scheva strusch plaz als adversaris. Naven dalla 20avla minuta ha Schluein Glion denton dominau e creau entochen pausa pliras bunas caschuns da marcar. La megliera caschun ha segir Leandro Bastos giu cuort avon pausa. El ei sbrigaus da siu defensur, ha schizun era aunc cuglienau il goli mo lu buca dumignau la balla sper in davos defensur vi che ha sittau naven ella naven dalla lingia.
Suenter pausa ei quei iu el medem stil vinavon. En la 61avla minuta ei in siet da Ronny Casutt vegnius frenaus d’in defensur sin la lingia e cura ch’igl arbiter ha mussau al defensur central dils hospitonts la carta melna cotschna suenter in da ses numerus fouls, han aspesctaturas ed aspectaturs mo spitgau pli sin che Schluein Glion decidi il giug en sia favur. Mo igl ei vegniu tut auter! En la 74avla minuta ha Matej Rappo ch’era cuort avon vegnius midaus en, astgau surprender suenter ina cunterattacca la balla senza vegnir disturbaus grondamein dalla defensiun da Schluein Glion. El ha getg engrazia e sittau la balla ferm e plazzau el cantun bass dretg agl 1:0. Sco sche quei fuss buca avunda ha lu in’ulteriura cunterattacca purtau en la 82avla minuta il 2:0 per Landquart entras Joao Madureira. Tier quei resultat eis ei stau entochen alla fin. Schluein Glion ha aschia piars in giu che l’equipa havess maina astgau spiarder ed aschia munchentau da segirar il secund plaz en la tabella.
FC Landquart – US Schluein Glion 2:0 (0:0)
Riet. – 110 aspectaturs. – AR: Tomasi.
Gols: 74. Rappo 1:0, 82. Madureira 2:0.
Landquart: Niggli; Eckert (62. Candrian), Huber, Oertli, Hertner; Fausch, Madureira (87. Pereira), Bless, Pirovino; Micevski (71. Rappo), Hashani (61. Iwadi).
Schluein Glion: Capaul; Derungs, Sgier, Coray (65. Büchler); D’Atria (65. Vinzens), Bearth, Ronny Casutt (77. Bundi), Bastos (77. Walter), Laurin Zala (65. Manetsch); Caduff, Lars Zala.
Remarcas: Cartas mellnas: 15. Sgier (foul), 45. Lars Zala (foul), 60. Oertli (foul), 76. Rappo (foul), 88. Bearth (foul). – Carta melna/cotschna: 70. Oertli (foul). – Schluein Glion senza Afzali, Mattia Büchler, Paulin (blessai/reconvalescents), Deplazes, Pool, Rechenbach (malsauns) – Corners: 4:10.