Suenter ina buna emprema mesadad, en la quala Schluein Glion ha sittau in gol, tuccau ina gada la petga ed ina gada la latta e buca schau bia dil giug als hosps da Triesenberg, ei il giug semidaus en la secunda part. D’in mument sin l’auter han ils indigens piars ballas, dau pass falli e piars cumbats um encunter um, aschia ch’ils hosps han getg engrazia, han sittau dus gols e priu tut ils treis puncts cun els a casa. Petta pagada per Schluein Glion.
Il giug ha enschiet cun ina dominanza dall’equipa da Schluein Glion. Gia suenter tschun minutas ha Rafael Deplazes tuccau suenter ina biala acziun persunala mo la petga. Bien tschun minutas pli tard ei il 1:0 denton curdaus entras Laurin Zala. Il goli da Triesenberg ha deviau ina balla aulta insufficientamein direct ad el avon ils peis, aschia ch’el ha saviu alzar la balla ord in anghel git en la reit. La megliera caschun d’alzar il resultat ha suenter ina biala cumbinaziun sur pliras staziuns Serafin Bundi giu diesch minutas pli tard. Siu siet ei denton rebattius naven dalla traversa giu sin lingia e lu anora enstagl en la reit.
Era suenter pausa ha Schluein Glion giu l’emprema caschun da marcar. In siet da Lars Caduff ei denton vegnius bloccaus sin lingia da gol d’in defensur. Silsuenter ha Schluein Glion dau il giug complet ord da maun. E sco gia descret cheusura han ils hosps buca schau rugar duas gadas e nezegiau las malsegirtads en la defensiun dils hospitonts. En la 59avla minuta ha Cedric Chevalley egalisau cun sittar ina balla deviada en la reit ed en la 82avla minuta ha Ricardo Maia de Sousa astgau suenter plirs sbagls da differents giugadurs indigens sittar la balla da gol en. Sin quella frida ha Schluein Glion buca saviu reagar pli ed aschia spiars per la secunda gada en seria in giug che l’equipa havess maina astgau spiarder.
US Schluein Glion – FC Triesenberg 1:2 (1:0)
Crap Gries. – 164 aspectaturs. – AR: Ibraimi
Gols: 12. Laurin Zala 1:0, 59. Chevalley 1:1, 82. Maia de Sousa 1:2.
Schluein Glion: Capaul; Gianluca Casutt, Derungs, Aron Büchler (81. Coray); Sgier, D’Atria, Bundi (71. Bearth), Laurin Zala, Vinzens (69. Bastos Rodrigues); Deplazes (61. Lars Zala), Caduff (86. Manetsch).
Triesenberg: Pupovac; BĂĽchel, Viegas Soares, Hasler, Hanselmann; Sljivar (76. Vogt), Meier (29. Ribeiro de Sousa, 71. Gassner), Maia de Sousa (90. Beck); Mazzini, Chevalley, Sokoli (76. Meier).
Remarcas: Cartas mellnas: 30. Bundi (foul), 36. Büchler (foul), 72. Pupovac (foul), 78. Gassner (foul), 90. D’Atria (foul), 90.+ 4. Manetsch (foul). – 5. siet en la petga Schluein Glion (Deplazes), 21. siet en la latta Schluein Glion (Bundi). – Schluein Glion senza Afzali, Mattia Büchler, Paulin (blessai/reconvalescents), Ronny Casutt, Pool, Walter (absents) – Corners: 8:4.