Suenter ina emprema mesadad plitost ruasseivla e senza biaras acziuns offensivas sin omisduas varts, decida Schluein Glion il giug egl emprem quart ura dalla secunda mesadad cun treis gols. Avon la imposanta culissa da bunamein 500 aspectaturas ed aspectaturs ha Trun/Rabius bein aunc sittau il gol al 3:1. Per dapli ha ei denton buca tunschiu, aschia che l’equipa da casa ha decidiu il giug definitivamein cun sittar dus ulteriurs gols en las davosas diesch minutas.
Dalla emprema mesadad dat ei buca da scriver la massa. En la secunda minuta havess Schluein Glion stuiu ir en avantatg. Suenter ina biala attacca sur pliras staziuns ei Serafin Bundi numnadamein vegnius al siet tut persuls avon il goli da Trun/Rabius. Cun ina buna reacziun ha Livio Lozza denton bloccau il siet e salvau il remis als hosps. Tals han giu en la 29avla minuta lur suleta caschun da sittar in gol. La deviaziun da Patrizio Decurtins ord cuorta distanza sin in pass neu dalla vart dretga ei denton ius mo per pauc sper il gol vi.
La secunda mesadad ei lu stada pli animada ed ella ha entschiet en bein per Schluein Glion. Gia suenter duas minutas ei la balla setschentada suenter in corner tier Gian Sgier che ha buca studegiau gitg e sittau cun ina balla artgada ord vegn meters sia equipa en avantatg. Tschun minutas pli tard ei Lars Caduff vegnius survius da Laurin Zala en la zona da puniziun, el ha cuglienau siu defensur e plazzau la balla al 2:0 el cantun ault dretg. E mo quater minutas pli tard ei gia il 3:0 curdaus. Quella gada ei Lars Caduff mitschaus suenter in culp liber rebattius da Trun/Rabius ord l’atgna mesadad all’entira defensiun dils hosps ed ha buca schau schanza al goli cun in siet plazzau el cantun bass. En la 68avla minuta han ils hosps lu aunc inagada survegniu empau speronza da forsa tuttina aunc saver volver il giug, suenter che Patrizio Decurtins ha sittau suenter in corner il 3:1. Schluein Glion ha denton dau fetg concentrau e disciplinau en la denfensiun ed ha aschia buca lubiu als hops da crear grondas caschuns da marcar. Cun duas cunterattaccas en las davosas diesch minutas ha persuenter l’equipa da casa mussau ch’ella sa puspei nua ch’ils gols stattan a Crap Gries ed ha sittau entras il giuven Ronny Casutt, suenter ina sperta attacca sur pliras staziuns ed cun il tierz gol persunal da Lars Caduff dus ulteriurs gols al resultat final da 5:1.
US Schluein Glion – FC Trun/Rabius 5:1 (0:0)
Crap Gries. – 490 aspectaturs. – AR: Züst
Gols: 47. Sgier 1:0, 52. Caduff 2:0, 56. Caduff 3:0, 68. Decurtins 3:1, 83. Casutt 4:1, 90. Caduff 5:1.
Schluein Glion: Capaul; Walter, Gianluca Casutt, Derungs, Aron BĂĽchler (86. Coray); Sgier (65. Bearth); Laurin Zala (86. Bastos Rodrigues), Bundi (79. Manetsch), Ronny Casutt, Deplazes (62. Lars Zala); Caduff.
Trun/Rabius: Lozza; Pfister, Flepp, Damian Schmed, Elia Schmed; Maissen (86. Friberg), Rovin Schmed (63. Cajacob), Decurtins (89. Aurelio Carigiet), Orlando Monn (69. Andri Carigiet), Robin Monn; Derungs.
Remarcas: Cartas mellnas: 36. Damian Schmed (foul), 52. Deplazes (foul), 65. Caduff (foul), 69. Gianin Derungs (foul), 75. Elia Schmed (foul), 78. Bundi (foul), 80. Andri Carigiet (foul), 82. Laurin Zala (foul). – Carta melna/cotschna: 85. Damian Schmed (foul). – Schluein Glion senza Afzali, Mattia Büchler, Paulin (blessai/reconvalescents), D’Atria (malsauns), Carigiet, Alessandro Casutt, Holderegger, Pool (absents); Trun/Rabius senza Caduff, Cauzza, Duff, Jacomet, Denis Monn, Muoth, Ramon Orlik. – Corners: 5:3.