Tgi che ha giu viu igl emprem malgartegiau giug da primavera encunter Sargans ha fatg gronds egls da veser sco l’equipa da Schluein Glion ei sepresentada a Triesenberg, notabene l’equipa che cumbatta cun Schluein Glion per il secund plaz en la tabella.
Tut quei che ha muncau a Sargans ei stau avon maun a Triesenberg: voluntad, cumbat, spertadad, engaschament ed era efficienza. Aschia ha l’equipa dominau naven dall’emprema minuta e schau duront il giug entir mai nescher dubis da buca turnar en Surselva cun treis puncts. Specialmein Laurin Zala ha fatg en l’emprema part dil giug ina pressiun enorma sur l’ala dretga ed aschia preparau cun bunas e spertas acziuns ils emprems dus gols. En l’otgavla minuta ha el surviu la balla a Ronny Casutt sil tgau e mo quater minutas pli tard a siu frar Lars Zala sil pei aschi perfetg ch’el ha strusch saviu far enzatgei auter che spedir ella da gol en. Era suenter quella buna entschatta ha Schluein Glion dominau il giug vinavon e schau als hospitaders sil stretg e cuort plaz negin terren liber per crear acziuns offensivas. Cuort avon pausa ha Lars Caduff alzau il resultat sin 0:3 cun plazzar in culp liber da biabein 25 meters sur il mir vi el cantun bass seniester.
Era suenter il té ha Schluein Glion buca schau luc ed instradau in’attacca suenter l’autra. E puspei ein biaras attaccas vegnidas lantschadas sur l’ala dretga dil giugadur Laurin Zala che ei semussaus en ina fuorma da gala en quei giug. Il quart gol ha el sittau en la 53avla minuta suenter in rush gest sez e per realisar il tschunavel gol ha el surviu la balla al rutinier Carlo Bearth cun in siet da cantun exact sil tgau. Tschun minutas pli tard ha Carlo Bearth sittau siu secund gol e mussau ch’el ha buca piars sias qualitads avon il gol e siu bien nas da star el dretg liug per realisar. Il gol da honur per l’equipa indigena ei curdaus diesch minutas avon la fin dil giug suenter il siet da cantun.
FC Triesenberg – US Schluein Glion 1:6 (0:3)
Leitawies. – 95 aspectaturs. – AR: Feldmann
Gols: 8. Ronny Casutt 0:1, 12. Lars Zala 0:2, 40. Caduff 0:3, 53. Laurin Zala 0:4, 63. Bearth 0:5, 68. Bearth 0:6, 79. Chevalley 1:6.
Triesenberg: Pupovac; Viegas Soares (76. Banzer), Banzer (16. Abidi), Arpagaus, Meier; Mazzini (81. Vogt), Sokoli (59. Jonas Gasner), Robin Gasner, Beck (90. Mazzini); Chevalley, Vogt (16. Maia de Sousa).
Schluein Glion: Capaul; Laurin Zala, Gianluca Casutt (86. Lars Zala), Derungs, BĂĽchler; Sgier (75. Holderegger), Ronny Casutt, Vinzens (67. Nuno Gomes), Bearth; Lars Zala (75. Coray), Caduff.
Remarcas: Cartas mellnas: 34. Ronny Casutt (foul), 36. Rogin Gassner (foul); 54. Sgier (foul), 76. Mazzini (foul). – Schluein Glion senza Afzali, Deplazes, Paulin, Pool, Walter (blessai/reconvalescents), Bundi, Manetsch (serrai). – Corners: 4:10.