Egl emprem giug suenter la pausa d’unviern a Crap Gries ha l’equipa da Schluein Glion mussau ina buna prestaziun encunter il plitost fleivel adversari FC Walenstadt. Gia suenter l’emprema mesadad ei il giug staus decididus, aschia che la secunda part ei plitost stada mo empau divertenta.
Um dil giug ei il caposettagols da Schluein Glion, Lars Caduff, staus. El ha sittau en l’emprema mesa ura in classic „hattrick“ ed aschia menau sco capitani sia equipa sin la via al success. Per sittar ses treis gols eis el vegnius sustenius pulitamein da differents giugadurs digl adversari. Siu siet en direcziun dil cantun bass en la quarta minuta ha il goli schau ir denter la detta ora en gol e siu culp cul tgau en la dudischavla minuta han gest dus giugadurs ed aunc il goli buca saviu frenar, aschia che la balla ha puspei anflau la via en la reit. Era il tierz gol persunal da Lars Caduff en la 29avla minuta ei vegnius possibilitaus entras in sbagl dil defensur central da Walenstadt. Tal ha stuiu schar mitschar in pass da Ronny Casutt sperasvi els peis dil caposettagols che ha buca schau rugar da sittar siu sedischavel gol en quest campiunadi. Mo duas minutas pli tard ei lu era aunc il 4:0 curdaus entras Lars Zala, il qual ei vegnius survius en la gassa da: Lars Caduff!
Il té da pausa e la calira ha lu schau vegnir il giug en la secunda mesadad ualti quiets. Schluein Glion ha buca stuiu far bia pli per gudignar e Walenstadt ha buca saviu far enzatgei per dar ina sviulta al giug. Aschia ei il giug segenaus encunter la fin cun enqual caschun per Schluein Glion ed igl emprem siet sin gol da Walenstadt en la 55avla minuta. Bien diesch minutas pli tard eis ei lu gartegiau als hosps da sittar il gol dalla honur entras Raffaele Tassone. Il tschunavel gol dils hospitonts ha Remy Manetsch sittau en la 82avla minuta cun in precis siet ch’ei vegnius menaus dalla petga da gol en. Era el ei vegnius lantschaus da Lars Caduff che ha reagau spert suenter in schul digl arbiter ed ha buca schau temps als defensurs da sepreparar per l’execuziun dil culp liber.
US Schluein Glion – FC Walenstadt 5:1 (4:0)
Crap Gries. – 155 aspectaturs. – AR: Ponjavic
Gols: 4. Caduff 1:0, 12. Caduff 2:0, 29. Caduff 3:0, 31. Lars Zala 4:0, 68. Tassone 4:1, 82. Manetsch 5:1.
Schluein Glion: Capaul; Coray, Aron BĂĽchler, Walter (48. Nuno Gomes); Derungs, Ronny Casutt, Tiziano Vinzens (48. Afzali), Laurin Zala, Holderegger; Lars Zala (69. Manetsch), Caduff.
Walenstadt: Gavric; Patrick Loop, Pfiffner, Jud, Doyen (60. Gulli); Tassone, Karisik, D’Agostino, Nicola Loop; Gubser (46. Reinhardt), Qehaja (Milojkovic).
Remarcas: Cartas mellnas: 78. Karisik (foul), 80. Jud (foul). – Schluein Glion senza Mattia Büchler, Gianluca Casutt, Deplazes, Paulin, Pool (blessai/reconvalescents), Sgier (serraus), Bearth, D’Atria (absents). – Corners: 6:4.