Schluein Glion cuntonscha suenter 2023 puspei il final dil Cup grischun

En in tipic giug da cup gudogna Schluein Glion cun 2:1 gols encunter siu adversari buca il pli „carezau“ satel, satel e cuntonscha aschia il final dil Cup grischun. Sch’ils giugadurs indigens havessan denton nazegiau – cunzun en l’emprema mesadad – pli efficient lur caschuns da marcar fuss il giug gia staus decidius da pausa.

Schluein Glion ha surpriu naven dall’entschatta il giug enta maun e ha lantschau in’attacca suenter l’autra encunter il gol dils hosps. L’equipa ha era creau pliras bunas caschuns da marcar, ils siets finals ein denton stai memia pauc decisivs e precis, aschia che aspectaturas ed aspectaurs han stuiu spitgar entochen la 28avla minuta per veser igl emprem gol. En quella minuta ei Lars Caduff vegnius survius sin la vart seniastra dalla zona da puniziun e ha canunau la balla cun forza e perschuasiun el tschiel dalla reit senza schar ina schanza al goli dils hosps. Tals han giu en l’entira emprema mesadad sulettamein ina buna caschun da marcar. Quella havess cuort avon la pausa denton bunamein purtau l‘egualisaziun. La deviaziun da Rahael Eckert ei denton setschentada en la petga e da leu els mauns dil goli indigen.

Suenter il té ha Landquart fatg empau dapli per l’offensiva ed suenter diesch minutas puspei giu discletg cun tuccar mo il aluminium. Il culp cul tgau da Yaron Bless ei rebattius dalla traversa. Quella buna caschun ha svegliau l’equipa da Schluein Glion e mo duas minutas pli tard ha Remy Manetsch alzau il resultat cun in ferm siet ord cuorta distanza denter las combas dil goli en la reit. El ei vegnius survius da Sattar Afzali che ha suenter in liung temps da reconvalescenza puspei giugau inagada naven dall’entschatta. Suenter quei gol ha Landquart stuiu investar aunc dapli en l’offensiva. Cun sittar mo tschun minutas pli tard in corner cun dabia „effet“ eis ei gartgiau a Renato Oswald da scursanir il resultat e da dar nova tensiun al giug. Per dapli ha ei denton buca tunschiu, aschia ch’il giug ei ius a fin cun ina victoria meritada per Schluein Glion che astga aschia dar il final dil Cup grischun. Tal ha liug d’Anceinza a Cuera encunter il CB Lumnezia. Tut ils „fans“ dall’USSI ein envidai da vegnir el stadiun all‘ Obere Au a sustener l’equipa.

US Schluein Glion – FC Landquart 2:1 (1:0)

Crap Gries. – 150 aspectaturs. – AR: Simone

Gols: 28. Caduff 1:0, 57. Manetsch 2:0, 62. Oswald 2:1.

Schluein Glion: Mattia Büchler; Coray, Sgier, Aron Büchler, Walter; Afzali (D’Atria), Ronny Casutt, Vinzens (24. Manetsch), Lars Zala (77. Holderegger); Bearth (81. Nuno Gomes), Caduff.

Landquart: Dennler; Eckert (58. Iwadi), Bless, Gerzic (31. Oertli), Fonseca Pereira (46. Hashani); Hermle, Huber, Oswald, Candrian (69. Hertner); Pirovino, Micevski.

Remarcas: Cartas mellnas: 20. Bearth (foul), 35. Candrian (foul), 55. Huber (foul), 90. Sgier (foul), 90. + 1. Hermle (foul). – Schluein Glion senza Gianluca Casutt, Deplazes, Paulin, Pool, Laurin Zala (blessai/reconvalescents), Bundi, Derungs  (absents). – 45. + 1. siet en la petga Eckert, 57. siet cul tgau en la traversa (Bless). – Corners: 6:4.