Suenter ina emprema mesadad zun lungurusa ha Schluein Glion decidiu il giug en las davosas 20 minutas entras dus gols dil caposettagols dalla tiarza ligia, Lars Caduff. Duas gadas eis el vegnius lantschaus cun pass en la profunditad e duas gadas ha el schau negina schanza al goli digl adversari e plazzau la balla cun siets segirs el cantun bass dretg.
Dalla emprema mesadad vala ei da scriver nuotzun. La secunda mesadad ei lu stada empau pli animada, era perquei che ils hosps han finalmein ughegiau da far empau dapli per lur offensiva. Quei ch’ei capeivel, sco davos dalla tabella che sto urgentamein recaltgar puncts per mitschar dalla relegaziun. Duas gadas fuss ei lu era bunamein gartegiau a Panaduz dad ir en avantatg. Mo ina minuta suenter pausa ha Jon Jenal denton tuc cun in culp liber che tuts han munchentau mo la petga e Vito Oliveira ha stuiu mirar sco siu culp cul tgau ei rebattius dalla traversa diesch minutas pli tard. Autras pusseivladads da marcar ha la defensiun da Schluein Glion buca lubiu ed encunter la fin dil giug, cura che las forzas dils giugadurs da Panaduz ein tschessadas ha Lars Caduff nezegiau sia spertadad e decidiu il giug cun bia saung freid. En la 71avla minuta eis el vegnius lantschaus da Serafin Bundi ed el temps supplementar da Gian Sgier cun pass en la profunditad. 9Omisduas gadas eis el mitschaus a siu defensur e persuls avon il gol ha el buca piars la gnarva, mobein plazzau la balla omisduas gadas bass e segir sper il goli vi en la reit. Quels dus gols han purtau a Schluein Glion ulteriurs treis puncts e per Panaduz vegn ei entras quella terrada pli e pli precar alla cua dalla tabella. La differenza da tschun puncts sin il secund davos ei ina pulita hipoteca per ils davos quater giugs da campiunadi.
US Schluein Glion – FC Panaduz 2:0 (0:0)
Crap Gries. – 150 aspectaturs. – AR: Lukic
Gols: 71. Caduff 1:0, 90. + 2. Caduff 2:0.
Schluein Glion: Mattia BĂĽchler; Remy Manetsch (25. Laurin Zala), Bundi, Aron BĂĽchler, Coray; Derungs (77. Holderegger), Sgier, Ronny Casutt, Rafael Manetsch (63. Walter); Lars Zala, Caduff.
Bonaduz: Rodrigues; Tscharner, Florin (90.+2. Jairo Caluori), Cleto, Knellwolf; Lussu, Jenal, Barros (63. Lauro Caluori), Seiler; Truffer (46. Oliveiro), Gartmann.
Remarcas: Cartas mellnas: 43. Coray (foul), 59. Lars Zala (foul), 61. Lussu (foul), 66. Sgier (foul), 84. Seiler (foul), 90. + 4. Jenal (sittar naven la balla). – Carta cotschna: 71. Cleto (violenza). – Schluein Glion senza Gianluca Casutt, D’Atria, Deplazes, Paulin, Pool (blessai/reconvalescents), Afzali, Gomes, Vinzens (absents). – 46. petga Panaduz (Jenal), culp cul tgau en la traversa Panaduz (Oliveiro). – Corners: 7:2.