En in bien giug da tiarza ligia denter duas equipas fetg ulivas ha in giugadur fatg la differenza: Lars Caduff. Cun ses gols 23, 24 e 25 en quest campiunadi ha el procurau per ulteriurs treis puncts per Schluein Glion ed aschia pli u meins segirau il secund plaz en la tabella.
Il giug denter il secund (Schluein Glion) ed il tierz (Cuera 97 2) dalla tabella ei naven dall’emprema minuta staus intensivs e sperts ed omisduas equipas han encuretg l’offensiva cun schar ir la balla spert en las atgnas retschas. Las empremas bunas caschuns da marcar han ils hosps giu, la megliera Carlo Bearth cun in siet ch’ei vegnius deviaus en la petga suenter 10 minutas. Diesch minutas pli tard eis ei gartegiau a Schluein Glion dad ir en avantatg. Ina cumbinaziun sur pliras staziuns sur la vart dretga ei vegnida terminada cun in pass travers da Laurin Zala, Lars Caduff ha surpriu la balla e stuschau ella sur lingia en. La reacziun dils hospitaders ei suandada sil fiat e duas gadas entras igl attaccader Davide Rosafio. En la 24avla minuta ha el plazzau in culp liber sper il mir vi en il cantun bass ed aschia battiu il goli da Schluein Glion e mo quater minutas pli tard ha el strufegiau ina malprecautadad en la defensiun dils hosps e sittau la balla naven dalla lingia da puniziun en la reit. Schluein Glion ha suenter quellas duas fridas durvrau in mument da puspei vegnir el giug. En la 39avla minuta ei Tiziano Vinzens denton vegnius mess a tiara en la zona da puniziun dil goli indigen, aschia ch’igl arbiter ha schulau e mussau sil punct da penalti. Lars Caduff ha buca saviu nezegiar quella caschun; siu siet ha il goli teniu cun sminar ordavon en tgei cantun che la balla vegni sittada. Mo quater minutas pli tard ha Lars Caduff reparau siu sbagl e puspei egalisau il giug. In bi pass liung en la profunditad da Ronny Casutt ha el cun sia spertadad cuntonschiu avon il goli e menau la balla sper tal vi en la reit.
Suenter la pausa han las duas equipas giugau sco avon la pausa. Omisduas han vinavon encuretg l’offensiva ed ein vegnidas tier bunas caschuns da marcar. La megliera per Schluein Glion ha Sattar Afzali munchentau en la 55avla minuta cun sittar la balla ord cuorta distanza sur gol ora, la megliera per Cuera 97 2 Jesse Neuhaus en la 75avla minuta cun emblidar da sittar cuort avon il gol ed aschia piarder la balla. En la 82avla minuta ha Lars Caduff mussau tgei ch’in caposettagols fa sch’el vegn survius en la vischinonza dil gol cun in bien pass. El ha cuglienau il defensur e lu sittau la balla atras las combas dil goli indigen al resultat final. Siu tierz gol persunal per quei giug ed il 25avel en quest campiunadi. El ha pia mussau ch’el ei en fuorma per il final dil Cup grischun che suonda ussa gievgia proxima (Anceinza) encunter il CB Lumenzia.
Cuera 97 2 – US Schluein Glion 2:3 (2:2)
Obere Au. – 90 aspectaturs. – AR: Topic
Gols: 20. Caduff 0:1, 24. Rosafio 1:1, 26. Rosafio 2:1, 42. Caduff 2:2, 82. Caduff 2:3.
Chur 97 2: Suznjevic; Anghileri, Texeira, Collenberg, Detommaso; Walser (82. Affolter), Grazia, Manojlovic, Neuhaus; Mogus, Rosafio.
Schluein Glion: Capaul; Laurin Zala, Coray, Aron BĂĽchler, Walter; Bearth (65. Sgier), Ronny Casutt, Vinzens (65. Derungs), Afzali (65. Gomes); Lars Zala (80. Rafael Manetsch), Caduff.
Remarcas: Cartas mellnas: 30. Detommaso (reclamar), 58. Walter (foul), 59. Walser (malsportadad), 63. Catricala (trenader; reclamar), 90.+3. Gomes (retardar il giug). – Schluein Glion senza Gianluca Casutt, D’Atria, Deplazes, Remy Manetsch, Paulin, Pool (blessai/reconvalescents), Bundi (absents). – 10. petga Schluein Glion (Bearth). – 39. + 90. Caduff munchenta mintgamai in penalti. – Corners: 5:6.