Naven dall’entschatta entochen alla fin ha Schluein Glion dominau il giug encunter la secunda equipa da Cuera 97 ed aschia gudignau meritadamein. Cun dapli efficienza havessen ils indigens schizun saviu sittar in tschuat gols dapli, pliras buna caschuns da marcar ein denton vegnidas munchentadas.

Il secund giug a casa ha purtau la secunda victoria en quest campiunadi a Schluein Glion encunter in adversari che ha mussau duront il entir giug ina plitost fleivla prestaziun e sittau sulettamein treis gadas sin gol. Quei lai capir che l’equipa dalla capitala ha ussa suenter quater giugs aunc negins puncts sin siu conto e ch’ella ha era aunc buca sittau in soli gol. Ils giugadurs da Schluein Glion ein naven dall’entschatta stai allerts ed han duvrau mo tschun minutas per ir en avantatg. Lars Zala ha surviu la balla a siu numalin Lars Caduff cun in pass travers, il qual il caposettagols dils onns vargai ha menau sur la lingia en. Silsuenter han plirs giugadurs empruau d’alzar il resultat, adumbatten: il bien goli da Cuera 97 2 ni la petga ni atgna insufficienza han impediu quei. Pér cuort avon la pausa ha Sattar Afzali reussiu cun in siet cul tgau sin flanca da Rafael Deplazes e mo ina minuta pli tard ha lez sez era aunc anflau la via al success e sittau il 3:0, suenter in pass profund ed exact da Lars Zala. Aschia che Schluein Glion ha tuttina saviu ir cun in resultat quietont e beiber té.

Era en la secunda mesadad ei il giug buca semidaus. Ils indigens han fatg pressiun e creau bunas caschuns da sittar gols, mo l’efficienza ha aunc adina muncau. Aschia ch’in sulet siet da Lars Caduff ha anflau la via en la reit al resultat final da 4:0. Suenter quella victoria suonda ussa per Schluein Glion gia sonda proxima il giug encunter il CB Lumnezia. A Crap Gries ei pia temps da derbi ed ins astga spitgar che l’equipa dalla Lumnezia vegn buca far aschi lev als giugadurs dalla Foppa da gudignar. Sche vus vuleis sezs veser quei, il giug entscheiva sonda sera allas 18:00 uras.

US Schluein Glion – Cuera 97 2 4:0 (3:0)

Crap Gries. – 120 aspectaturs. – AR: Kammerer

Gols: 5. Caduff, 45. Afzali 2:0, 45.+1. Deplazes 3:0, Caduff 4:0.

Schluein Glion: Capaul; Laurin Zala, Coray, Aron Büchler (81. Arpagaus), Wellinger (46. Walter); Vinzens (46. Cavegn), Ronny Casutt, Afzali (67. Nuno Gomes); Deplazes (79. Weishaupt), Caduff, Lars Zala (58. Rechenbach).

Cuera 97 2: Silva; Gasem (78. Bogdanovic), Anghileri, Collenberg, Ruben Rodrigues; Manojlovic, Thayapararajah (28. Araya), Almeida, Hertner (46. Mogul); Ranieri, Rosafio (56. John Rodrigues).

Remarcas: Cartas mellnas: 25. Ruben Rodrigues (foul), 56. Rosafio (foul), 76. Catricala, trenader Cuera  (reclamar). – Schluein Glion senza Paulin (reconvalescents), Mattia Büchler, Gianluca Casutt (blessai),  Holderegger, Manetsch  (absents). – 18.+ 85. siets en la petga Schluein Glion (Caduff, Cavegn). – Corners: 11:2.