Ei ha pariu sco sche las duas defensiuns da Schluein Glion e Triesenberg han giu mess pag tgi che vegni da far ils bia sbagls en novonta minutas! La finala eis ei stau la defensiun dils hosps che ha fatg in sbagl dapli che la defensiun indigena, aschia che Schluein Glion ha sittau in gol dapli e gudignau il giug 4:3. Il giug havess denton era saviu ir a fin cul resultat da 10:10.

Gia naven dall’emprena minuta ha il festival da sbagls entschiet. Ei ha denton duvrau in quart ura avon che Tim Patrik Schreiber ha nezegiau in schenghetg e sittau igl emprem gol. Pressapauc diesch minutas pli tard ha Schluein Glion egalisau il giug entras Lars Zala. In pass liung dad Aron Büchler ha anflau la via sper ils giugadurs dil hosps ora tier Lars Caduff, aschia ch’el ha saviu survir la balla a siu conattaccader per marcar il 1:1. Silsuenter han omisduas offensivas munchentau pliras caschuns plitost malamein e las equipas ein idas cun in pari en la pausa.

Suenter il té han puspei ils hosps entschiet meglier il giug. En la 46avla minuta ha Cedric Chevalley tuc cun in siet da distanza mo la traversa. Treis minutas pli tard ha el denton sittau il secund gol per Triesenberg. Sin la vart seniastra eis el mitschaus a siu defensur ed battiu il goli da Schluein Glion cun in siet el cantun liung bass. Mo treis minutas pli tard ha l’equipa da casa puspei egalisau il giug. Puspei ha Lars Caduff lantschau Lars Zala ed il giuven giugadur ha sittau siu dudischavel gol persunal en questa sesiun. Il proxim sbagl dalla defensiun indigena ei denton capitaus mo nov minutas pli tard. Cedric Chevalley che steva tut persuls en posiziun d’ordgiug ei vegnius survius cun in pass d’in defensur indigen. Il rutinau attaccader ha getg engraziel fetg e marcau cun saung freid il tierz gol per ils hosps. Quella gada han ils hospitonts duvrau empau dapli temps per egalisar. Puspei ha ina balla liunga anflau la via sper la defensiun ora e Lars Caduff ha saviu cuorer persuls encunter gol e marcar. Cura ch‘ei veseva ora sco sche il giug mondi a fin cun in pari, ei il gol dalla victoria tuttina aunc curdaus; e quei per l’equipa da casa. Sittau il gol ha puspei Lars Caduff ch’ei vegnius survius da Lars Zala naven dalla vart dretga e che steva tut persuls amiez avon il gol. Ils hops han silsuenter aunc empruau tut d’egalisar mo en las davosas minutas ei quei buca gartegiau, era sch’igl arbiter ha schau dar suenter otg minutas e schizun il goli rinforzava l’offensiva dils hosps.

US Schluein Glion – FC Triesenberg 4:3 (1:1)

Crap Gries. – 195 aspectaturs/-as. – AR: Övünc

Gols: 14. Schreiber 0:1, 23. Lars Zala 1:1, 49. Chevalley 1:2, 52. Lars Zala 2:2, 61. Chevalley 2:3, 74. Caduff 3:3, 87. Caduff 4:3.

Schluein Glion: Capaul; Laurin Zala (90. Weishaupt), Coray, Aron Büchler, Walter; Arpagaus, Vinzens (67. Cavegn), Ronny Casutt; Afzali (84. Gomes), Caduff, Lars Zala.

Triesenberg: Dosch; Gritsch (76. Sommerauer), Sljivar, Büchel, Sousa; Meier, Beck, Schreiber; Mazzini, Chevalley, Hanselmann (63. Soares).

Remarcas: Cartas mellnas: 49. Sljivar (foul), 79. Mazzini (foul), 90. + 6. Caduff (foul). – Schluein Glion senza Gianluca Casutt, Manetsch, Paulin (blessai, reconvalescents), Deplazes, Rechenbach, Wellinger (absents) . – 46. siet en la traversa Triesenberg (Chevalley). – Corners: 5:7.