Era el davos giug dalla prerunda ei l’equipa da Schluein Glion ida sco victura giu dil plaz e sa aschia ir cun in bien sentiment en la pausa d’unviern. Quei ei numnadamein stau la novavla victoria egl endischavel giug e cun 28 puncts sesanfla l’equipa da Mirco Zala sin il secund plaz en la tabella, mo in sulet punct davos il capogruppa Sargans.

All’equipa da Gams ha Schluein Glion mussau naven dall’entschatta ch’ella seigi promta per quei giug sin in plaz fetg profund e malneidi. Gia en la sisavla minuta han ils attaccaders fatg pressiun sin la defensiun indigena e saviu recaltgar entras Lars Caduff la balla. Lez ha surviu tala a Lars Zala che ha  cuglienau siu defensur e sittau il 0:1. Il secund gol per Schluein Glion ei curdaus siat minutas pli tard entras Rafael Deplazes. Suenter in pass el profund eis sepresentaus persuls avon il goli indigen, ha cuglienau quel e stuschau la balla en la reit. Ils patruns casa han giu lur emprema buna caschun da marcar en la 27avla minuta. Il giuven goli da Schluein Glion, Emanuel Gienal, ha denton menau cun in reflex il siet da Loris Scherzinger sur la traversa ora. Siat minutas avon la pausa ei il tierz gol per Schluein Glion curdaus. Lars Caduff ha puspei fatg pressiun sin la defensiun dils indigens, ha saviu gudignaur la balla dil davos giugadur ed aschia cuorer persuls encunter gol e marcar il 0:3.

Suenter il té da pausa ei il giug vegnius empau pli ruasseivels, quei pli probabel era pervia dallas relaziuns dil plaz che han custau dabia forza. Schluein Glion ha giu il giug enta maun ed ha strusch dau curascha als hospitonts da forsa aunc saver volver il giug. Las bunas caschuns da marcar han vinavon ils hops giu, l’equipa da Gams ei sulettamein vegnida da recaltgar ina roscha siets da cantun, ils quals han denton in sco l’auter purtau negin fretg. Schluein Glion ha persuenter cun sittar il quart gol entras Lars Zala en la 58avla minuta decidiu il giug definitivamein ed aschia astgau ir a casa cun treis ulteriurs puncts el sacados.

FC Gams  – US Schluein Glion 0:4 (0:3)

Pilgerbrunnen, Gams. – 165 aspectaturs/-as. – AR: Schwendener.

Gols: 6. Lars Zala 0:1, 13. Deplazes 0:2, 38. Caduff 0:3, 58. Lars Zala 0:4.

Gams: Pürstl; Lorenz (58. Kesseli), Odobasic, Andrade, Zymeri (68. Holtermans); Eris, Heeb (44. Mirosljevic), Bolat (79. Eberle); Qengaj (68. Jung), Scherzinger, Carkic (79. Gantenbein).

Schluein Glion: Gienal; Capeder, Aron Büchler, Coray, Vinzens (69. Weishaupt); Ronny Casutt, Deplazes, Rechenbach (69. Gomes); Afzali (46. Arpagaus), Caduff, Lars Zala (77. Cavegn).

Remarcas: Cartas mellnas: 31. Lorenz (foul), 31. Qengaj (reclamar), 43. Rechenbach (foul), 73. Scherzinger (foul), 75. Eris (foul), 85. Odobasic (foul), 89. Coray (foul), Aron Büchler (foul). – Schluein Glion senza Gianluca Casutt, Manetsch, Paulin, Walter, Laurin Zala, Wellinger (blessai, reconvalescents), Capaul (absents). – 70. siet en la traversa Schluein Glion (Lars Zala). – Corners: 11:7.